Ka Khasi Jaintia Christian Leaders’ Forum (KJCLF) da pynsñiaw ko yei pyrchah yei thmu ka sorkar wow pynkmen du ya kawi ka niam hawa pynkyntang ya ka State University wa nyngkong ka Meghalaya.
Ha ka kyrwoh wa da phah, da ong wa ka sorkar man ko kawa hakhmat dooh hei leh pynroh wei leh khyllew deiwa leh chongchit wow pynkyntang ya ka State University deiwa lehniam Christan.
Ka KJCLF da ong ko wa jylla toh kawa pawnaam wow pynman ki tamasa kiwa syat dor lakam wa chah dawa poisa wei pawnaam ko leh wow pynman ya kiwa boon ki yalang wai mooyurim.
Tangwa ym em pyrkhat wa ka jylla em ko cha tre dooh heiyatoh wa ka puræ puthi deiwa pynrap wa ini wa sdang ya ka State University toh iwa bha wei hap wow kyrchaan yeini.
Kamtæ da ong wa i thmu wow wai noh ya ka Captain Williamson Sangma State University ha kani ka 13 tarik da wanrah ko boon i kulmar heiyatoh wa kiwi ki jait niam wei ki kaam niam toh kiwa em ha kti yong uwi pa uwi wei toh leh u burom wei ymtoh u leh chiliang katkam wa da booh ha ka riti synchaar ka ri.
Da ong leh wa u Montri ka chnat Puræ Puthi toh u pynlut yei por wei chongchit mynsien neibynta ka chnat wa pait u deiwa pyndap pynbiang yeiwa emkaam kiwa lai puræ puthi kamjooh deiwa sikai u tip wow burom kylliang.
Discussion about this post