U Montri Rangbah ka jylla, u Conrad K Sangma da ieh u hei stat ki paidbah wow bichaar ya kitu kiwa pynbaad wa i pynman ya ka Cabinet Meeting cha baar ka Secretariat toh tang wow pynlut phut.
Hawa klam ynne ka sngi hadien wa da wai ka Cabinet Meeting ha Orchid Resort, New Shillong Mawkasiang, u Conrad da ong u wa bichaar hi lada i pynlut phut næ kreh i yei kaam.
Da ong u wa ynnin u snem hawa ka sorkar pynman ko ya ka Cabinet Retreat ha Sohra leh, da yoh wow ya phyllu bniah bha jai wei toh na kani ka daw wa ka sorkar da chim biang ko ya kani ka laad wa khroo wow pynthymme yei rukom krehkaam ha ka chnat puræ puthi khamtam hawa yatoh wa i su ya ka tulop kiwa sikai wa kiwi de ki kaam.
Da ong u wa lyngba kani ka Cabinet Retreat kawa da pynman ha u snem wa dadep, da ye wow pynsmat hadooh 80,000 tylli ki File kiwa jooh lai kyllaiñ jelebi nachwa tangwa kattæ da pynlai bait sak du hapoh 24 kynta yow pynsmat cha ki paidbah kiwa haap ha ka CM Special Development Fund.
Ka Cabinet Retreat kawa da wanrah ya waroh ki chnat sorkar nadooh ki sahep kiwa khian hadooh kiwa heh dooh kiwa da ya phyllu neibynta wow pynsmat ya ki kaam pynroi ha ka jylla khnang wa ka jylla u kynjoh ko cha ka yoh ka kot kawa $10 Billion kat ha u 2030.
Discussion about this post