Ka seiñ ki Hindu na Assam wa tip kam ka Kutumba Surakshya Parishad (KSP) da thoh ko cha u Montri Rangbah ka jylla, u Conrad Sangma heiyatoh wa i rai yei pynemkaam ya ka krem Mawjymbuiñ wa em ha chnong Mawsynram.
Da ki ong wa ki kam ka seiñ toh kiwa kreh yow wanrah yei yatylli hapoh ka ri katkam ka Article 51(A) ka Constitution wei ini wa jia hapoh ka krem Mawjymbuiñ leh man ko leh ha ka jooh ka yurim wei da dep ki wow yachem wa ka Seng Khasi Hima Mawsynram wa ka Meghalaya Indigenous Minorities Tribal Forum.
Da ong leh wa kam kiwa chong chnong ka India em ki ka hok wow mane Blai, u im wei wow ong yeiwa em wa sñiaw ha ki kamjooh wow lai hapoh ka ri deilang wa kiwi de ki hok, wei ym em wa ye wow pyndooh yeini i hok khlem da pait leh ya ka jaitbru næ ka niam wei man ko i kaamram yong uwi pa uwi wow leh yeiwa da pynkit ya ki hapoh ka Article 51 (A) ka Constitution ka ri India.
Kamtæ da ong ki wa ini wa kwah ki neibynta ka krem Mawjymbuiñ man ko leh ka hok katkam ka riti synchaar deiwa kyntu ya u Montri Rangbah wow pynyoh yei hok yong ki.
Da ong ki wa iwa kwah ki wa u moo Shivling wa em hapoh kani ka krem toh u wai oo neibynta waroh nadooh kiwa kwah wow mane kamjooh kiwa uiñke suwari deiwa ong wa ini daw yarap ko wow pynmih poisa neibynta ka jylla.
Da kyntu ki leh ya u Montri Rangbah wow khang yei thang ya ki dia, ki dhup wa kiwi de hapoh ka krem yow neh i miat ko kamjooh u khang leh yei wan booh syntu, ki soh wa kiwi de yow lait u chah ktah kani ka thaw.
Da e buit leh wow booh bru ha thaw wow psiah cha kani ka krem yow pynlang ya ki soh wa kiwi de wa wanrah ki bru yow ye u e won ki cha kiwa dooh wa duk.
Da kular ki leh wow ya krehlang yow pynman ya kani ka krem kawa kordor wa em parom hapoh ka ri khlem da ktah yeiwa ngait ki tre chnong neibhah ki leh maya wei burom ki ya dustur riti kiwa chong chnong ka Meghalaya.
Discussion about this post