Ynne ka sngi uwi na ki RJ na ka Radio Mirchi, Shillong u RJ Nicky da wan hiar u cha Iawmusiang, Jowai wow pait yei jhep wa da nohroi ha kylleiñ ka Jowai hei emlang ki dkhot ka Synjuk ki Waheh Chnong Jowai wa ki paidbah kiwa da mih wow pyrchah joor yei boon palat i jhep iwa da sahkut da boon boon sngi ha kylleiñ ka chnong Jowai.
Ha kani ka sngi neiliang ka Synjuk Ki Waheh Shnong Jowai (SKWSJ) hapoh i yahkhmat u President u Alan Niangti da mih ki wow ya ksohkti lang yow pyrchah ya ini i neh i jhep khlem kit de ha Iawmusiang.
U Alan Niangti da ong u wa ini i kaam wa sah i jhep toh iwa da neh da ki bnai ha Jowai wei neiliang ka Synjuk da pyrchah wei da yaklam ko leh khamtam wa u MLA ka thaaiñ, tangwa kat dang mih ki sngi ini i neh i jhep ha kylleiñ ka chnong Jowai da neh ki khlem khat hadooh ynne ka sngi. Da khana u leh wa da thooh laad wow yachem wa u Montri sorkar wa pait ya ki kaam pynroi ya ki thaw wa em cha sor tangwa ynnin na ki daw wym ye u kiar da dooh wow yachem wa oo heiwa da yachem biang wa u MLA ka thaaiñ uwa da kular wa ha ka tayaw wow wan daw pynbait noh ya ini i kaam.
Hajrong ini, neiliang u Niangti da ong u wa ka Synjuk e por u chi tayaw wow pynbait ya ini i kaam.
Neiliang u RJ Nicky da pyntip u wa da em ka thong krehkaam namo ka Campaign kawa ong ‘My Shillong My Pride’ ya kawa da leh u ha kylleiñ ka sor Shillong neibynta i khooid i suba wei hadien wa da yoh yei ujor na ki lok kiwa na Jowai kiwa da ood yei sah i jhep ha Jowai iwa da ktah ya ka imlang ka sahlang, kamtæ da wan khnang u wow chim ya kani ka Campaign kawa ong ‘My Jowai My Pride’.
Da ong u wa iwa phylla toh wa kammon ini i jhep iwa em hajan ka yung krehkaam u DC ka Jowai da neh i kamni, deiwa kylli wa kammon ki bor District ym ye ki mo wow pait ya ini i eh wa da pynmih ya i sma-tung.
Chooh chooh da ong u wa i bahkhlieh yong oo ym toh du neibynta ka Shillong tangwa ya ka jylla hi waroh kawi.
Da kylli u leh ya ka sorkar deiwa ong, “Da jan 50 snem i yoh jylla tangwa hadooh katni tang ka Waste Management ym pu ye wow pynkrehkaam, em hok i mo wow ya lehkmen yei dap 50 snem ka jylla?”,
Lyngba ini i pyrchah deilang wa kiwa yahkhmat chnong wa ki khon khynroo ka Jowai, da kyrmen skem wa ki bor wa toh u pait u chimkhia smat ki khnang wow man ka mynried wa tyrchaaiñ ya ka pateiñ kawa daw wan.
