Hadien wa mih i dawa na ka seiñ Jaiñtia Hills Truck Owners Association (JHTOA) na ki karkhana pynmih khyndawbilat wow bood ya ka rai ka sorkar hajrong ka bai kit mar ki truck. Ynne ka sngi da pynman ya ka yalang hapyrdi ki dkhot ka JHTOA wa ki dkhot ka All Jaiñtia Cement Manufactures Association (AJCMA) ha Byndihati, East Jaiñtia Hills District.
Hadien ka yalang hawa yaklam wa ki heh ka AJCMA, u RK Pareek (President) wa u Pawan Joshi (Secretary). U Pareek da ong u wa katkam ka rai wa u Deputy Commissioner ha u snem wa dadep da pdiang ki tangwa kiwi tawon ki mat dawa ka JHTOA daw hap phah ktien cha ki bor pynlai (Management) yong ki karkhana.
Da kyntait u yei kam ka JHTOA wa ki karkhana ym em u bood ki ya ki kyndon wa da booh da ka sorkar deiwa ong wa ki karkhana da bood ki yei dor thij ya ka bai kit mar heiwa katkam ka rai da ka sorkar da booh ya iwi don i dor wow kit wei wow pynhaap (Loading and Unloading) hapoh ka jylla donhi iwa T. 7 chi MT chi Kilometer.
Hawa kylli wa ka JHTOA da dawa ko wow su ya i dor T. 7 hapoh u pood ka jylla wei cha Assam won ye ki karkhana wow su deiwi i dor, neiliang u Pareek da ong u wa ym em kam katæ ka rai wei yeini daw yaklam da ki bor pynlai yong ki karkhana.
Heiyatoh won wa ki kudam (Godown) da pynche u deiwa ong wa nadooh nachwa da em ki ha Meghalaya (Byrnihat wa ha 9Mer) wa ha Assam wei hadien wa joor i dawa ya i mar, kamtæ ki bru wa pynlai yaw (Marketing) leh da leh ki katkam wa yoobiang ki yow lai i mar.
