Jowai: Ka HYC Seiñbei wa ka tnat Jaiñtia Hills District ryngkat ka JSU ha ka 9 tarik uni u bnai da lai yachem ki ya u SP ka West Jaiñtia Hills District, u Vivek Syiem ha yung krehkaam yong oo ha Jowai wow yaklam wei wow booddien hajrong i jia wa sñiawsih ha Trangblang, Amlarem Sub Division heiwa da dooh yei mynsien u Waheh Chnong wa Secretary ka Amlanai ryngkat uwi won wa kiwi kiwa da mynsoo ha ka 6 tarik uni u bnai.
Ya ka HYC la yah da u Roy Kupar Synrem, General Secretary wei neiliang yong ka JSU da em da u President Central Body, Jowai hei emlang ki dkhot yong ka HYC Jaintia Hills Distrct.
Ha kani ka yachem ki seiñ da ban joor ki ya u SP wa ki pulit wow kem lut ya waroh kiwa emkti ha ini i kaam wymman wa sñiawsih wow chim yei mynsien bru. Da ban joor ki leh wa neiliang ka Aiñ ki toh u leh ki deiwa khor wei wow takit yeini iwa jia.
Neiliang u SP da pyntip u wa nadooh wa jia neiliang ki pulit da chimkhia ki yeini wei i takit dang man i iwa lai bait wow chem wei wow pynchitom ya waroh kiwa emkti ha ini i kaam.
Heiyatoh wa i chngaaiñ kiwa chong chnong ka Amlanai kiwa haap lai luti na Trangblang, neiliang u SP da pyntip u wa em ki pulit kiwa sonteri ya kani ka thaw yow wanrah chong suk.
Chooh chooh neiliang ki seiñ da ong ki wa daw booddien ki yeini i kaam wei wow pyntikna wa kiwa hayung kini ki bru u yoh ki yei bichaar iwa hok katkam ka aiñ.
Kani toh katkam ka khubor lyngba u Publicity Secretary, HYC Jaiñtia Hills District, u Romingstar Madur.
Discussion about this post