Booddien ka JSM neibynta ki wym pu em yoh thaw puræ Class-XI hadooh kattæ

Ka Jaiñtia Students’ Movement (JSM) Education Cell ynnin ka sngi da booddien ko yei daw wa dooh thaw puræ ki khynnah wa lai Class-XI ha ki skur sorkar kiwa em ha Jaiñtia Hills hapoh i yahkhmat yong u Educational Secretary ka Western Region, u Heyhok Supuh, u Educational Secretary ka Central Body, u Wellson Siangshai, u Working President ka Central Body uwa man leh kam u In-charge President ka Western Region, u Jimmy Raul Kharmuti wa kiwi kiwi de ki dkhot yong ka seiñ.

Ha ini i lai booddien ka JSM, da lai pait ki yei long i man ki Higher Secondary School nadooh ka Kiang Nangbah Government Higher Secondary School waka Government Boys’ Higher Secondary School Jowai.

Hadien ini i lai pait yei long i man yong kini ki skur, ka JSM da lai yachem ko wa u Deputy Commissioner ka West Jaiñtia Hills District, heiyatoh wa kammon u wiah yow chieh wa thar wa dung ya ki khynnah wa lai puræ heiwa kiwa yahkhmat ka JSM da pachat yumut ki cha u DC wa ya kini ki khynnah ki wym pu yoh Admission ymtoh u pyndooh noh yei thrang yong ki u lai puræ du neidaw wa khynnia ki skur neibhah lada ym yoh thaw puræ ki daw ktah ko ya ka mynried yong ki, wei da man lakam wa tooh noh yei angnood ki wow yoh ya ka mynried wa bha. Neiliang u DC da kular u wow leh yeiwa emkaam hajrong wow pynyoh Admission ya ki khynnah waroh khlem da pynslem yei por.

Hadien i yachem wa u DC, ka JSM da lai yachem ko sa ya ka DSEO ka West Jaiñtia Hills deiwa e kti ya ki kot ki sla yong ki khynnah kiwa dang yang u yoh Admission wei kamwa da phah na ka yung krehkaam yong ka ha ka chithi kawa da jubab da ka cha ka JSM haka 04-07-2024, da kular ko wow leh iwa bhatam ya kini ki khynnah waroh u pynyoh Admission ya ki kamjooh leh neiliang yong kani ka sahep da ong ko wa daw em ka yalang hapyrdi ka DSEO wa ki Principal kiwa pynlai ya ki Higher Secondary School kiwa em ha Jowai, khnang wow pynyoh Admission ya kini ki khynnah waroh.

Related posts

Da jied ya u Robert Francis Prevost kam u Pope wa thymme

May 8, 2025

Pynkhreh ka sorkar wym duna baam ha Meghalaya lada toh joor ka thma

May 8, 2025

Neiliang ka JSM kawa da lai luti da slem ki por hajrong ini i eh da pynsñiaw ko yei burom nadooh ya u DC, ka DSEO wa ki Principal wa da e ki ka kti timun tidiang neibynta ka mynried ki khon khynroo khyllood yong i.