Jowai: Hadien wa chah ktah ki hali neidaw u slap wa i chlai-um ha kini ki tayaw wa dadep ha kylleiñ ka Ri-loom Jaiñtia khamtam hapoh Laskien C&RD Block, ynne ka sngi ka JSU da booddien ko ya ki laad yarap na ka sorkar heiyatoh weini.
Neiliang ka JSU-Laskein Block Circle, hapoh i yahkhmat u President yong ka, u Dapmain H Suchiang dei mynsien wa sñiawkhia da lai u yachem ko ya u BDO ka Laskien Block, u Brightstar Langbang wow kylli hadooh katwon wa ka yung krehkaam yong oo da leh ko hajrong ini.
Neiliang u BDO da khana u wa katkam wa man kattæ ka yukheiñ wa da yoh da em kamwa 3,000 tylli ki manyung wa da chah ktah.
Da pyntip u leh wa ka yung krehkaam yong oo da dep leh ko yeiwa emkaam wei ya ki yukheiñ da phah cha ka yung krehkaam u Deputy Commissioner ka West Jaiñtia Hills khnang wow leh yeiwa emkaam.
Neiliang ka seiñ da e khublei ko leh ya u BDO ka Block wa da chimkhia u yeini wow pynsuk ya ki paidbah hapoh ka Block deiwa kyntu leh ya ka sorkar wow pynsmat u pynpoi yarap cha kiwa chah ktah.
