Ka Khasi Students’ Union-Jowai Circle ynne ka sngi hapoh i yahkhmat u Vice President, u Morning Pasi wa u General Secretary, u Nidapoi Shadap, u Education Secretary, u Conard Sana yong ka Jowai Circle waka President KSU Girls’ Wing & Education Secy (War Jaintia Circle), ka Ladaplin Hayong kamjooh ki dkhot ka Jowai Circle, da lai pait lai sylli ki yaka Govt. Girls HS School Hostel wa em ha Mynthong, Jowai.
Ha kani ka sngi da yachem ki leh yaka Principal ka Govt. Girls H.S. School kawa da ong wa kani ka Hostel ym man de wow sah ki khynnah neibhah wa da jæd da pra ko wei ki kynroh da sdang piah ki wei ym chngaaiñ de wow em kiwa sah.
Ka Principal da ong ko leh wa neiliang ka skur da booh ko chiboon ki chithi ha ka sorkar wow pait ya ini wei neiliang ka sorkar da wan ki du chisien ha u snem 2023 wei kani ka Hostel ym man de ko wow chna pynmiat (Repair).
Hadien ini ka seiñ da chem sakhiat ko wa ka Hostel ym man de ko wow sah ki khynnah wei da kular ko wow booddien yeini ha ki bor wa hajrong khnang wow man kani ka thaw kawa biang wow sah.
K seiñ da ong ko leh wa i em ki Hostel sorkar daw pynsuk ko chiboon ya ki khynnah wa wan puræ na baar Jowai.
Kani ka Hostel ye ko wow pdiang hadooh 80 ngut ki khynnah skur wei neidaw wa da piah ko da hap khang noh yaka ha u 2018.
Discussion about this post