Ka India Meteorological Department (IMD) da pyntip ko wa ka ær-yong Cyclone ‘Yaas’ da kylla man ko kam ka Very Severe Cyclonic Storm wei daw poi ko ha West Bengal wa Odisha ha i janmiet ka 26 tarik uni u bnai.
Heiyatoh wa kani ka ær-yong, neiliang ki montri ki chnat ka sorkar pyrdi da pynman ki ya ki yalang wow booddien yei man i long kani ka ær-yong.
U montri ki kaam pohyung ka ri, u Amit Shah ynne ka sngi da booddien u yei kyrriah ya ki bru na ki thaw wa em hei maa, yei pynkhreh ya ki bordiñ wa chaan dooh (Power Backup) ha ki Hospital, wei man chngaaiñ ki kor wa ki thaw pynmih la’ær Oxygen.
Neiliang u montri ka chnat Railways, Commerce & Industry wa kiwi kiwi, u Piyush Goyal da yaklam u wa ki karkhana wa heh wa kiwa khian heiyatoh wa i pynkhreh yong ki wow yakhun ya kani ka ær-yong.
Da ong u wa ym em u lait-rood kiwon kiwon ki kaam wow yada ya i rukom pynpoi Oxygen wei kamjooh wow yada ya ki bru.
U Director General ka NDRF, u SN Pradhan ynne da pyntip u wa da em palat 100 tylli ki Team ka NDRF ki wow lai cha Odisha, West Bengal, Jharkhand, Tamil Nadu, Andhra Pradesh wa ha Andaman & Nicobar Union Territory heiyatoh wa i pynkhreh wow yada wei wow yarap ya ki bru.
