Booddien lang ki pulit ka Meghalaya ya i chah tynyap ka khyllood ha Delhi

Shillong: U Montri Rangbah ka jylla, u Conrad K Sangma da ong u wa ki pulit ka jylla daw yakrehlang ki wa ki pulit ka Delhi wow yoh kem ya ki bru wa tynyap ya ka Wandalin Konger ha ka 28 tarik u bnai wa dadep.

U Conrad da ong u yeini hawa jubab ya ka Zero Hour wa da wanrah da u Meralborn Syiem MLA ka Nongpoh yei wym chngaaiñ ki khynroo khyllood kiwa kreh namo puræ cha baar jylla khamtam i chah tynyap ka khyllood na ka chnong Purdiwa Kharpati, Ri-Bhoi district.

U Conrad da ong u wa hadien wa tip yeiwa jia da phah ya uwi u pulit deilang wa kiwa hayung hasem ka Wandalin cha Delhi wow chimkti yei metyap yong ka wei neidaw wym man de u kit ya i metyap cha jylla da tlep noh ya ka ha Delhi.

Da ong u wa ki pulit ka jylla hadooh katni dang booddien ki yeini deiwa ong leh wa ki pulit ka Delhi man ki kiwa smat wow kreh hajrong ini.