Shillong: U Lat ka jylla u Satya Pal Malik ynnin ka sngi da pynman yalang u yow boddien yei pynkrehkaam yaki Scheme kiwa naka sorkar pyrdi khamtam ki yong u Prime Minister deiwa ya emlang ki sahep sorkar ka East Khasi Hills, West Khasi Hills wa South West Khasi Hills District ha Raj Bhavan, Shillong.
Ya kani ka yalang (Review Meeting) da wan wow emlang da ki Deputy Commissioner wa ki Superintendent of Police deilang leh wa ki sahep sorkar ki District kiwa pait yei pynkrehkaam ya kini ki Scheme ha ki 3 tylli District.
Ki Deputy Commissioner da pynyoo ki ya iwa da leh ki heiyatoh wa ki Scheme wa emkaam kam ka MGNREGA, Pradhan Mantri Awas Yojana , PM Jan Dhan Yojana, PM Matru Vandana Yojana, SSA, NHM, PM Ujjwala Yojana, PMGSY wa kiwi de. Ki Deputy Commissioner da khana ki leh ya iwa chem chitom hawa pynkreh ya kini ki Scheme ha ki jar jiar ki District yong ki.
Hadien ini da yaklam won hajrong ki kaam wa yatoh waka aiñ heiwa ki Superintendent of Police da pynyoo da khana ki chaphang ki kaam pyrchah aiñ, ki khayi bru, khayi drugs, khayi mar tooh wei iyi wa da leh yow kdooh u khoom ya kini ki kaam.
Neiliang u Lat da pynsñiaw u yei sñiawhun yei rukom pynkrehkaam yaki Scheme wei da kular u wa ki kaam wa pynthut kam i duna wa em ki Bank, i wym biang ki Mobile Network daw chimkhia ya ini. Da ong u leh wa ki kaam wa yatoh wa i chait ki manbei, ki Scheme yong ki khynnah toh kiwa em hajan bha u nood u, kamtæ da kyntu u ya ki heh District wow chimkhia leh ya ki.
