Booddien u Metbah Lyngdoh ya ki Scheme wa ki Project sorkar hapoh South Garo Hills

Baghmara: U montri ka tnat Tourism ka jylla, u Metbah Lyngdoh ynne ka sngi da booddien u ya ki Scheme wa ki Project yong ka sorkar ha Baghmara, South Garo Hills hei emlang u MLA ka Siju Rongara, u Rakkam Sangma, u MLA ka Chokpot u Lazarus Sangma wa u Executive Member ka Garo Hills Autonomous District Council (GHADC) u Sengnal Sangma.

U Deputy Commissioner ka South Garo Hills u Hubert Marak da pyntip u cha u Metbah heiyatoh wa ki Scheme wa ki Project wa da pynkreh ha South Garo Hills.

U Marak kyrmen skem u wa kam ini i booddien ya ki project wa ki Scheme sorkar daw yarap ko wow wanrah i yajan hapyrdi ka sorkar wa ki sahep yong ka wow thooh ki laad wow pynlai bait ya ki kreh waroh.

U Metbah hawa e i klam ha kani ka sngi da ong u wa i daw wa wan booddien ya kini ki kreh ym mut i wow wan wohdaw tangwa wow ap wow sñiaw yei eh i khoo wei wow thooh ki laad ki luti wow wanrah yei rukom kreh wa khooid wei wow wanrah i yajan hapyrdi ki paidbah wa ka sorkar.

Related posts

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Pynbna ka VPP ya ki kyrtong MDC ha ka JHADC wa KHADC

November 13, 2024

Ki sahep yong ki tnat waphær waphær da pynche ki heiyatoh wa ki kreh kiwa dang sahteiñ kiwa dang kreh ki hadooh katni.

Ki phang wa kongsan wa da klam ha kani ka sngi toh ki sarok, i duna i em ki bank, i duna ki mobile network wa kiwi kiwi kiwa da ktah sakhiat ya ki paidbah ka South Garo Hills.

U MLA ka thaiñ da pyntip u cha u montri heiyatoh wa slah thut i rukom saam bordiñ, ka um dih, i sih u sarokbah National Highway 51 wa 62, kiwa man ki thiedsnaam yong ka roi ka paar.

Neiliang u Metbah hadien wa ap u yeini waroh da kular u wa ka sorkar daw thooh ko ki laad ki luti wow wanrah yei kaam pynroi hapoh ka District waroh kawi.

U MLA won yong ka Siju Rongara, u Rakkam Sangma da ong u wa ki heh sorkar toh u chim kabu ki ymtoh du wow pynsñiaw ya ki kaam wa bha wa da leh hapoh ka District tangwa wot wow pynsñiaw leh yeiwa da sangeh leh ki kreh khnang wa neini chaphrang u ye u thooh ki laad wow pynbait ya ki.

U MLA ka Chokpot, u Lazarus Sangma da pynsñiaw u yei mynsien wa khia yei rukom pynkrehkaam ya ki Scheme waphær waphær deiwa kyntu ya ka sorkar wow thooh ki laad wow ye u pynemkaam yeiwa em hapoh ka District waroh kawi.