U MLA warim na Nongkrem, u Ardent M. Basaiawmoit da pynbaad u wa i wai ya ka khyrdop næ Entry & Exit Point ha Umling, Ri-Bhoi District toh du wow pynbiej ya ki paidbah, wei toh i leh khnang yong ka sorkar yow mih i wym sñiawsuk na ki jylla wa marjan wa kani ka khyrdop ym man ko.
Da ong u wa lada pynkrehkaam ya ka ILP, ym emkaam wow booh ya ki khyrdop neibhah ki bru kiwa wan psiah cha ka jylla hap ki wow yaleh chwa ya ka ILP, wei ym mut wa katwa lai ki daw chah pynsangeh ki, tangwa hap wow yaleh ILP wei lada ym leh, daw chah pynchitom, tangwa kamwa man, ka khyrdop da wai katni toh du wow lait wym em khuslai de.
U Ardent da beiñ u leh ya kiwa yahkhmat saiñpyrthei kiwa yah bakla ya ki paidbah hajrong ka Inner Line Permit, deiwa pynrap wa lada puræ bha ki ne ym em ya ka Bengal Eastern Frontier Regulation, 1873 hachwa wow yaklam ki.
Hawa jubab yeiwa klam u MP ka Shillong, u Vincent H Pala wa ka ILP ka ye ko wow ktah ya ka kaam uiñke suwari ha ka jylla kawa toh kawi na ki laad yoh kaam, u Ardent da ong u wa toh wow pait ya kiwi ki jylla kiwa pynkrehkaam ya ka ILP.
Da ong u wa iyi mut wow pynkylla ya ka ILP, wei lada em sakhiat i thmu wow kyntu ya ka kaam uiñke suwari ha ka jylla, toh wow wanrah ya ki laad wa emkaam deiwa pynlut rap boon wow pynbha ya ki luti syngkieñ wa da chah iehbieñ, neibhah hadooh katni ym pu em iwon iwon iwa da leh daka sorkar wow taan ya kiwa uiñke deiwa pynbiang ya iwa emkaam.
U Ardent da ong u wa i dawa ya ka ILP ha ka jylla toh wow pynkhlan, pynkhor wei wow paitbniah yei psiah i mih yong ki bru kiwa na baar. Da ong u leh wa ka Mizoram wa ka Sikkim toh ki jylla wa da pynkrehkaam ya ka ILP, tangwa hawa ya nujor ya kitai ki jylla, ki rap ku ki ha ki kaam uiñke suwari bar ya ka jylla Meghalaya.
