Booh ka FKJGP Bataw da ki bru wow pait yei psiah kiwa na baar chapoh ka chnong

Khliehriat: Ka seiñ FKJGP Bataw Unit hapoh i yahkhmat u President, u Deihok Sumer deiwa emlang wa u Adviser ka seiñ u Bilis Pyrtuh da lai yachem kyrpang ki wa ki kattu katni tylli ki yung kiwa chong chnong kiwa dai dukan ha tymbud u sarok Rymbai Bataw Borkhat Jalalpur (RBBJ) Road wow khang chwa ki u dai ya ki dukan yong ki cha ki baar chnong kamjooh leh u dai ki da i por lada toh du hapoh chnong leh.

Ini i yachem ka seiñ iwa da leh ynnin ka 26 tarik man ko leh kam chibynta wow ya syllok namo u pynsñiawthoh hajrong i sñiawma ya u khñiang COVID-19 uwa chim ya kiwa boon ki mynsien ki bru ha kani ka pyrthai.

Hei yaklam wa kiwa dai dukan da pynsñiaw ki yei kmen yei pynche wa rap bniah na ka seiñ wei pynsñiaw ki leh yei ya krehlang yow man i thmu ka sorkar wow yaleh pyrchah wa kani ka kjut khlam yong u Coronavirus.

U Deihok Sumer da maham joor u leh ya kiwon kiwon ki bru kam ki baar chnong u psiah ki chapoh chnong lada ym toh i kaam wym hoi dæ u dam, kamtæ ka seiñ da ong ko neiliang ka seiñ da phiah ko le ngut kawi kawi ka Team u man ki kiwa pait yei mih i psiah ki baar chnong hapoh u pood u ang ka chnong Bataw.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ki Team ka seiñ daw kylli lane takit bniah bha ki ya kiwon kiwon ki kari kiwa mih wa psiah chapoh chnong, ka seiñ da leh ko yeini neidaw wa boonsien hi ki bru kiwa em cha nongkyndong jooh kheiñstiñ ki yei phah ka sorkar wei ka seiñ sñiaw ko wa emkaam bha u yoh ya ki batai wa rap bniah.

Kam chibynta wow kyrchaan yei hukum ka sorkar da phah ko leh ya kani ka maham lada em kiwon kiwon kiwa chong chnong kiwa lai khih lai kreh cha baar ka jylla khamtam cha kitu ki jylla wa da chah ktah na kani ka kjut thymme kiwa yoh laad u liwan na ki thaw kreh lane thaw lai puræ yong ki ha kini ki khajiak sngi wow man ki kiwa smat wow leh ya ka Medical Check-up wei wow husiar wym hoi u lai ke cha yung ki bru kam chibynta u khanglaad yei poor uni u khñiang COVID-19.

Kamtæ ka seiñ da ong ko wa bha u yada bar yeiwa chah sumaar wei da kyntu joor ko yow man kiwa ya ksohkti lang wei kiwa kohngooh ya ka 21 sngi kawa ka sorkar da pynbna ko kam ka Lockdown hapoh ka ri India hi waroh kawi ong ka khubor na ka seiñ FKJGP Bataw Unit.