Heiyatoh wa i lehkmen ya ka Diwali ha ka 24 tarik uni u bnai ha waroh kawi ka East Khasi Hills District heiwa i lehkmen daw wanrah ko yei thang bomkala ha ki thaw paidbah kamjooh ki luti syngkieñ, wei lada ym booh kyndon daw wanrah i ood wa joor nei tympdung bomkala iwa daw booh leh hei maa ya ki paidbah kamjooh leh i pynhut.
Chooh chooh da ong wa ini daw wanrah i leh yei pyntngit ya ka la-ær iwa daw ktih yei chait i khiah ki bru, kamtæ da emkaam wow khang ya ki kattu katni ki jait bomkala wei wow booh dei por beibynta kiwi tawon ki jait.
Katkam ka hukum ka NGT wa da pynmih ha ka 29-10-2010 da ong wa i tngit ka la-ær wa mih na kiwon kiwon ki jait toh u khang kamtæ da emkaam wow booh kyndon yow pynemkaam ya ki bomkala wei ka sorkar da dep khang ko leh yei dai wei pynemkaam ya ki bomkala wa da chna na baar ri.
Kamtæ ka DC hapoh ka Section 144 CrPC da khang ko wow thied wei wow dai ya ki bomkala kiwa da chna na baar ri, i pyndait lang ya ki bomkala wa jrong ter iwa pynood bha yei sawa kamjooh iwa pyntngit bha yei chnong i thaw.
Da khang leh wow pynemkaam ya ki bomkala wa ye u ood palat 125dB (AI) lane 145 dB (C) pk hawa em 4 Meter nei thaw wa tympdung.
Da khang wow thang bomkala 100 meter na ki thaw wa em Hospital, Nursing Home, Primary wa District Health Care Centres, ki thaw puræ, ki yung bichaar, ki thaw mane wa kiwi de ki thaw wa da pynbna kam ki Silent Zone da ki bor sorkar.
Chooh chooh da pyntip wa i thang bomkala ha ka sngi Diwali u chaah naddooh 8:00 waje i miet hadooh 10:00 waje i miet donhi.
Da pyntip leh wa i dai bomkala toh du ba kitu kiwa da yoh License wei toh u dai du ki jait bomkala wa da chah donhi kiwa bood ya ki kyndon ka Central Pollution Control Board.
Ha ka sngi lehkmen hawa pynemkaam ya ki tanghæng (Audio Systems) toh u man katkam ki kyndon ka Noise Pollution (Regulation & Control) Rules 2000 heiwa da hap wow pyndait ya ki tiar wa tip kam ki Sound Limiter wei i ood i sur ha ki thaw wa em karkhana toh u man i 75 dB(A) Leq heipor sngi wa 70 heipor miet, ha ki thaw pynman yaaw toh u man i 65 dB(A) Leq heipor sngi wa 55 heipor miet, ha ki thaw wa sah ki bru toh u man i 55 dB(A) Leq heipor sngi wa 45 heipor miet katwa ha ki Silent Zone toh u man 50 dB(A) Leq heipor sngi wa 40 heipor miet.
Kani ka hukum u krehkaam ko chisyndon hadooh wa kut ka Diwali.
