Ka Khasi Student Union-Barato Unit kam chibynta wow pynneh pynsah wei wow da u kær ya ki doh um na kiwa tynyap khiar ya ki ha kiwa boon rukom ha ka Wah Mynriang ha Barato, West Jaiñtia Hills District da pyntip paidbah ko wa nadooh wa chimkti wow pait u yoo ya kani ka wah na ka Village Defence Party (VDP) ka Barato (A) da leh ko chiboon ki kaam wow pynbha katwa ye tangwa da em ki damok kiwa chim kabu yeini.
Kamtæ hajrong wow yada ya ka mynried da booh noh ko ya ki kyndon wa da khang wow leh ha kani ka Wah.
Kini ki kyndon kynthup ki ya kini hawah:
- Da khang pyrchah u thang bomb (Dynamite), u e da ki dawai bih, diang/pakhot jar, beh musari, u pynsngad ya ki dooid ki liar um wa kiwi ki kaam wa ktah ya kani ka wah.
- Ym chah ya ki bru kiwa na baar u wan sah miet ha ki thaw wym em ki tre chnong.
- Ym chah ya waroh kiwa na baar chnong kamjooh ki tre chnong u sah miet ha ki thaw kiwa da khang ha waroh ki miet Sngi Choh-that wa Sngi Bibar.
- Da maham ya ki bru kiwa wanrah kam jooh pynkha poor ya ki khubor thok khlem da em ki sakhi sabut wa biang.
- Da khang ya ka Thwai Thlunar Tyrsow nadooh Khriang Poh Yingkieñ hadooh Khriang Khlieh Thwai wym chah u khwe wa kiwi won i rukom tong doh neibhah wa da man ko kam ka Fish Sanctuary wei daw theh chooh ya ki dakha symbe ha uni u bnai.
- Ka seiñ da rai ko u chah du wow khwe donhi kat wym pynbna deiwi tawon, Ki Signboard ki dak moo da e ha waroh ki thaw wa da khang nadooh Shem Um hadooh Thwai Chyrngan, ka seiñ u pynchitom ko katkam ki aiñ ki kyndon ya kiwa leh pyrchah ya kini ki kyndon heiwa ka seiñ ym kitkhlieh ko lada em iwon iwon i jia iwa man pyrchah ya ka aiñ.
