Hadien wa joor i awri ha Lapangap ynnin ka sngi hapyrdi ki Karbi wa ki Pnar, ynne ka sngi won ki bor District na West Jaiñtia Hills wa na West Karbi Anglong District da yachem ki ha Lapangap wow pynbait ya ini i kaam.
Neiliang ka West Jaiñtia Hills da wan mihkhmat da u DC, u BS Sohliya wa u SP u C. Syrti katwa na West Karbi Anglong District kynthup ki ya ka DC ka Krishna Baruah wa u SP u I. Barua.
Ha kani ka yaklam, neiliang ki Karbi da booh ki ya ka mat dawa wow phut ya ki dieñ wa da thung ha Loom Moopyrdet wa Loom Pdeinphniar kiwa da yoh ka chnong lyngba ka Meghalaya Basin Development Authority kiwa dang dep thung ha kini ki bnai wa da dep hapoh ka chnong Lapangap wei lada ki Pnar phut ki ya kini ki dieñ i suk daw wan wei ki Pnar u yoh ki wow ah ya u kba wa dadep thung wa kynthuplang u kba uwa em ha Nongjrong.
Ki Karbi da ong ki wa ymtoh u thung ya kini ki dieñ deiwa e daw wa ini toh i thaw wa dang ya kajia.
Neiliang won ki bor pulit Assam da kular ki wow yada ya ki Pnar wow lai ah ya u kba uwa da rep ki ha Nongjrong wei toh u pyntip ki chwa wow lai ki cha kini ki thaw khnang wa ki pulit u ye ki wow leh yei kaam yong ki.
Chooh chooh da kular ki pulit Assam wa lada em kiwa pynkulmar daw kem ya ki wei daw wan pynyoo hakhmat kiwa chong chnong ka Lapangap yow pynsakhiat yeini.
Neiiiang won u DC ka West Jaiñtia Hills da ong u wa kani ka yahcem ynne ka sngi toh kawa jop deiwa ong wa dang lah wow phut ya kini ki dieñ yow rah ki hapoh ka Truck yow thung chawi neibhah wa dang kor u kba u khoo ya kini ki dieñ kamwa man kattæ.
U Waheh Chnong ka Lapangap, u Deimonmi Lyngdoh da pyntip u wa ya ka yalang paidbah u man ko mynstep i step heiwa u pynsñiaw ya i dawa i Karbi wei neitæ u ye u rai hajrong ini i kaam lada daw phut namo ym boi phut ya kini ki dieñ.
Discussion about this post