U Montri Rangbah ka jylla, u Conrad K. Sangma ynne da booh u ya u moyurim wow chna ya ka Fr. Joseph Bacchiarello, Science-cum-Library Block ka St. Anthony’s College, Shillong deiwa emlang ki dkhot ka thaw puræ, kiwa sikai wa kiwa lai puræ ka College.
U Conrad hawa e yei klam da ong u wa ka St. Anthony toh ka thaw puræ wa da pawnaam bha kawa da e chiboon cha ka imlang sahlang lyngba ka puræ puthi wei daw leh u katwa ye yow kyrchaan ya ini i kaam wa bha wow pynwandur ya ki khynroo khyllood yow ye u pynmih ya ki khloor hapoh ka jylla, ka thaaiñ waka ri waroh kawi.
Da klam u leh yei emkaam i thooh bniah, i chemphang wa ki buit wa thymme yow pynku yei yoh i kot ki bru. Chooh chooh da ong u wa ka sorkar da kreh ko wa kiwa boon ki thaw puræ wa em hakhmat dooh ka ri wa kiwa na baar ri ha kiwa boon ki jait kaam nadooh i chait i khiah waka rymaw.
Da ong u wa deiwa leh ya ini i ya krehlang daw yarap lang i ya ki thaw puræ wa em hapoh ka jylla.
U Principal ka St. Anthony’s College, u Rev. Br. Albert L. Dkhar hawa e ya i klam pdiang sñiawbha da pyntip u wa kani ka yung thymme ka St. Anthony’s toh kawa em 6 mala deiwa kheiñ lang wa kawa na tre dooh wei daw em ko leh ya ka Central Library ka College, kiwa boon na ki Science Department deilang waka Northeast India Audio Visual Archive.
