U Montri Rangbah ka jylla u Conrad K Sangma deilang wa u Deputy Speaker, u Timothy D Shira, u Bajengdoba MLA u Pongseng Marak wa ki MDC u Sukaram A Sangma wa Dolly Sangma da booh mooyurim ki yow chna yaka yingkieñ haka wah Damring ha Resubelpara, North Garo Hills District.
I jrong wa 1799.469 Meter deilang wa u sarok waka yingkieñ u chna hei dor wa T. 23.59 klur hapoh ka RIDF ka World Bank, wei kani ka yingkieñ daw pynyabi ko ya ki ar tylli ki sarok kitæ ka Songsak-Mendipathar wa Rongrong-Resudekachang kiwa pynyakhlaad daka wah Damring. Kini ki sarok leh toh kiwa pynyabi ya boon tylli ki chnong kam ka Thapa Darenchi, Thapa Agitchak, Dabadnaggre, Thapa Rongdenggre, Chidaret Ajaro, Moranodi, Doba Apal, Konchigol, Damebibra, Darampara, Daram Mangtu wa kiwi kiwi. Neidaw wym em ka yingkieñ ha kani ka wah, kiwa boon ki bru da hap ki wow pynemkaam da ki yingkieñ wa chna da ki chken ki siej kiwa chah rah kut wa heh ka um.
Deiwa em ka yingkieñ, daw pynduna ko yei lai luti hapyrdi ka Songsak-Mendipathar wa Rongrong-Resudekachang da kamwa 19 km.
Ha kani ka jooh ka yalang, da booh leh ya u mooyurim yow chna yaka yung skur wa thymme ka Resubelpara Government Higher Secondary School wa chongdor T. 2.5 klur da u Conrad Sangma deiwa emlang u Deputy Speaker, u Timothy D Shira, u Bajengdoba MLA u Pongseng Marak wa ki MDC u Sukaram A Sangma wa Dolly Sangma.
U Montri Rangbah da booh mooyurim u leh yow chna yaka Mini Stadium ha Resubelpara, hapoh ka State Plan Scheme wa chongdor T. 3.46 klur.
