Jowai: U montri wa pait yaka chnat puræ puthi, ka Border Area Development wa kiwi, u Lahkmen Rymbui ynne ka sngi da wai u ya u mooyurim yow chna yaka Circuit House ha Amlarem Sub-Division, Amlarem kamjooh yaka yung skur wa thymme ka LP School.
Ka J.U. Kharpuri, ADC, In-Charge Amlarem Civil Sub-Division, hawa e ya ki kyntien pdiang sñiawbha da pyntip ko wa ka poisa neibynta ka Circuit House da e da ka PWD katwa yaka LP School da yoh naka Border Area Fund.
U Lakhmen Rymbui da e khublei u ya u Comingone Ymbon ya iwa da kyrchaan wa iwa da sdang u heipor wa man u kam u Montri ka General Administration Development (GAD) wa PWD yow pynlait poisa yow chna ya ka Circuit House ha Amlarem Civil Sub-Division, da pyntip chooh chooh u wa ka Circuit House daw yarap ko wow pynstiñ yei kreh ki sahep wa wan na kiwi ki thaw wei da yooluti leh wa ini daw e mynsien ko ya ki wakreh. Da khana u leh wa najrong wa da miat chwa i thaw da wanrah ya ki kaam pynroi kiwa hadooh katni dang lai chakhmat ha Amlarem Sub-Division.
Da yooluti u leh wa lyngba kani ka yung skur wa thymme, kiwa sikai deilang wa ki khynnah skur daw ye ki wow kreh bha wei wow leh bha haka puræ puthi. Da khut u yei ya krehlang yong waroh yow yarap ya ki Contractor wow pyndep ki yei kaam yong ki hei por wa da booh.
Ka V.R. Syiem, MCS, Director of Border Area Development Office, Shillong da pyntip ko wa ka chnat da pynlait poisa ko T. 25 lak yow chna ya kani ka LP School wei da kyrpaad ko ya ka School Management Committee wow pyndep yei chna ha i por wa da booh yow myntoilang ki khynnah skur.
U P. Lhuid, Executive Engineer PWD Building, Jowai da pyntip u wa da pynlait T. 3.25 klur yow chna ya ka Circuit House, iwa daw em 6 kamra kawi ka VIP Suite, i thaw chet wa i thaw baam.
Ka A. Syiem, District School Education Officer, Jowai hei klam tbian yong ka da e khublei ko ya u Montri wow chimkhia u wow pynchna ya kani ka yung skur kawa da sih ka Amlarem Government L.P. School, kawa da sdang ha u snem 1974.
Yaka yalang da pynlai da u Jonathan Shylla, EAC, Amlarem Civil Sub-Division.
