U Lamphang ka Yung Dorbar Chna Aiñ ka jylla Meghalaya, u Metbah Lyngdoh ynnin ka sngi da yoh u wow wai ya u mooyurim yow chna ya ka yung krehkaam wa thymme yong u Block Development Officer ka Mairang Block deiwa emlang u Montri wa pait ya ka chnat Community and Rural Development, u Hamletson Dohling, u Montri wa pait ya ka chnat Water Resources, u Brolding Nongsiej, u Deputy Commissioner ka Eastern West Khasi Hills District, u W. Nongsiej, u BDO ka Mairang Block, u Dr. L.R. Hynniewta, kiwa kreh ki chnat sorkar waphær waphær wa kiwi de.
Hawa klam kam u kongsan, u Metbah da ong u wa ka Mairang Block man ko kawi na ki Block kiwa da rim tam ha ka jylla wei da ong u leh wa ka yung krehkaam u BDO man ko kawa emkaam wow pynyabi ya ki paidbah wa ka synchaar khadar lyngba ki chnat waphær waphær yong ka sorkar lyngba i pynkrehkaam ya kiwa boon ki Scheme ka sorkar jylla waka sorkar bei.
Da pynsñiaw u leh yei sñiawngooh ya u Montri ka chnat Community and Rural Department yei chimkhia u hawa yatoh wa ini i kaam heiwa da mang poisa T. 2.88 klur iwa daw yarap u sdang kreh noh.
U Hamletson hawa e yei klam hajrong i lai luti yong ka chnat ha ki snem wei khamtam dooh hawa yatoh wa i pynkrehkaam ya ka Scheme MNREGS wei i roi smat i em ki Self Help Group ha ki kajiak snem kiwa da lai. Da pyntip u wa waroh ki 46 tylli ki Block yong ka jylla daw yoh ki ya ka yung krehkaam wa thymme wa da mang poisa mar 2 klur 50 lak neibynta wow chna ya ki yung krehkaam thymme yong ki 6 tylli ki Block wei da mang yonglang waroh kamwa T. 120 klur neibynta wow chna ya ka yung krehkaam yong ki 40 tylli kiwi ki Block.
Kiwi kiwi kiwa da klam kynthup ki ya u Brolding Nongsiej, u Deputy Commissioner, u Additional Deputy Commissioner wa u BDO.
