U Nujorki Sungoh, MLA ka Mowkaiaw Constituency hawa e yei klam haka yalang booh mooyurim yow chna thymme ya ar tylli ki yungskur ha chnong Mowkaiaw ynne ka sngi, da pyntip paidbah u leh wa du hapoh chnong Mowkaiaw ki kaam pynroi wada ye u wanrah kam u MLA da kynjoh ko cha ka T. 10 klur.
Kini ki 10 klur kynthup ya T. 5 klur tam neibynta u chna yaki sarok waphær hapoh ka chnong Mowkaiaw, wa T. 4 klur tam nei bynta u chna ar tylli ki yungskur wa kynthup ka Mowkaiaw Govt L.P. School wada seiñ nadooh u snem 1939 kawa da mang u chna hei lut wa T. 44 lak tam waka Govt U.P. School Mowkaiaw wada seiñ nadooh u snem 1957 wada mang u chna hei lut wa T. 3 klur tam.
Ha kani ka sngi da pynbna haroh u wa haka 13 tarik uni u bnai daw booh mooyurim yow sdang noh yaka Police Outpost ha chnong Barato kawa da angnood kiwa boon ki chnong wei heijooh i por ka sorkar da mang ko u booh leh sa ar tylli ki Border Outpost hapoh ka Mowkaiaw Constituency wa kynthup ha chnong Mukroh wa Tihwieh khnang yow pyntikna ki laad yada yaki paaid ka Constituency wa sah ha khappood.
“Hei lai luti haka kaam Politics boi daw em kiwa pynsñiawthooh bakla deiwa ong, ya kani ka surok da leh da kitæ kitæ, tangwa u ong O ya phi ka roi ka paar, ka bha ka miat hapoh ka Constituency wym jia ko khlem i tip yong nga hapoh kini ki san snem,” ong u Nujorki Sungoh.
“Neibhah ya nga da pynkupbor da ki paidbah yow man u uwa pait wa sylli hapoh ka Constituency wei hapoh ki 5 snem wym em de kiwon kiwon wa ha khlieh yong nga. Kani wym toh dei stat yong nga tangwa dei bor wa ki paidbah Constituency da pynkup ki ha nga kam uwa mihkhmat,” da pynrap u Nujorki.
Hawa kyruiñ won u chei puræ puthi hapoh ka Laskeiñ Block, dap u dei ñiawliar neibhah wa ka Literacy Rate namo i pure puthi wa jooh poi 60% chaneiñ, katni won da hiar ko hapoh 50%.
Ini toh iwa pynsñiawsih ya oo, deiwa ong u wot hapyrdi wa lai i por wei ku i puræ puthi hantæ haka thaaiñ Laskeiñ Block jia kamni.
Kamtæ khut u i yakrehlang ki paidbah nadooh ki manbei manpa ki khynnah skur yow pynku yei stat i tip, neibhah du oo samen kam uwa mihkhmat wym ye u wow pynmankam.
Ha kani ka sngi da yoh leh i klam na u W.G. Sungoh MDC ka thaaiñ, ka DSEO West Jaiñtia Hills ka A.P. Syiem, ka SDSEO S. Bareh wa kiwi.
