U sarok chnong namo u Internal Road wa jrong 6 Km ka chnong Mowkaiaw, West Jaiñtia Hill District uwa da mang u chna hei lut wa duna T. 6 klur uwa pynyabi cha Raliang-Sahsniang da booh mooyurim ynne ka sngi da u Sniawbhalang Dhar, Montri ka chnat Tourism ka sorkar jylla hei emlang ki paaid wa chong chnong, u MDC ka Sahsniang u Habahun Dkhar, u B.W. Phira, S.E. PWD Roads Jowai Circle, u E.E. PWD (Roads) Shangpung wa kiwi.
Neidaw wa ya uni u jooh u sarok, u MLA ka thaaiñ u Nujorki Sungoh leh da dep pynbna paidbah u haka 9 tarik uni u bnai heipor wai mooyurim u ya artylli ki skur ha chnong Mowkaiaw, kamtæ neiliang ki bor chnong won ha kani ka sngi da ong ki wa i yoh ki ya uni u sarok toh dei khreh chitom, dei lai luti yong ki hi kam ki dkhot Executive Committee ka chnong hadooh wow lai yachem ya u Montri Rangbahdooh ka sorkar jylla kamjooh ki Montri sorkar, ki sahep sorkar wa toh yong ka chnat PWD (Road).
U waheh chnong warim ka Mowkaiaw, u Loving Laloo khana u wa nyngkong hi ya uni u sarok wa 6 Km da sdang pynkreh daka chnong lyngba ka skhim MGNREGA neibynta u ah khyndaw wei siang moo malu mala, neitæ da booddien da thooh laad won ki yow yoh siang pynmiat pynbha dei psiang.
Ha u 2018 da yachem ki wa u MLA, u Nujorki Sungoh deiwa kyrpaad ya oo u pynyoh tang kamwa 1 Km chi snem donhi, tang wym bien u wow leh iyi iyi, kamtæ ong u wa dei yahluti u Sniawbhalang Dhar da yoh ki u yachem wa u Conrad Sangma uwa da pyntikna leh u pynyoh ya ki uni u sarok.
“I sien khaddooh wa ka Mowkaiaw yoh sarok ko toh ha u snem 1988 kamwa 5 Km lyngba i yarap u (L) Purno A Sangma, kamtæ ha kani ka kynti da yoh biang ko sa 6 Km na u Conrad Sangma kiwa man chi pa chi khon,” ong u Loving Laloo.
“Sñiawsih wa heipor waka Executive Committee ka chnong li kyrpad ko u pynyoh sarok na u MLA u Nujorki Sungoh, ong pathan u wow e leh ym ye, u khut leh ym ye, tangwa kattæ won manda yoh tæ kam u,” ong u waheh chnong wa katni, u Shaniah Lamare.
Neiliang u Sniawbhalang Dhar won hawa klam ha kani ka sngi ong u wa hei sakhiat ya uni u mooyurim toh u wan wai da u Symbood Montri Rangbah, u Prestone Tynsong uwa man leh u Montri ka chnat PWD tangwa katwa em ka yalang wa heh ha Shillong da phah lai noh u da oo.
Ong u kani toh ka Scheme wa kyrpang wada e da u Montri Rangbah ka sorkar jylla, yaka Tender da khut wei ym slem de da sdang hi u kreh. Kamtæ kyntu u ya ki bor chnong u yakrelang neibynta i roi i paar wa i phooh i pheiñ ka chnong.
“Kamwa man katni yaka Mowkaiaw Constituency da chim O kam ka Constituency yong nga ha kiwa boon ki bynta, wei wym mut wa wan O cha kani ka thaaiñ yong phi wa choon O ya u MLA yong phi, tangwa i kaamram yong nga wow pait ya ki kaam wym ye u MLA yong phi u leh,” ong u Sniawbhalang Dhar.
Hawa paan kyrchan won u ya u kyrtong ka NPP, u Habahun Dkhar haka Election 2023, ong u ya ki paidbah wym toh u awri ki iyi iyi leh neibhah iyi wym ye u Habahun u leh hadien wa jop u toh oo wow kyrchaan nadien yong oo.
Hawa kyruiñ won u cha ka sorkar ong u, “I kaam pood toh kawa hakhmat dooh wei kat chawa lai u Montri Rangbah wym jooh dam u wow pynche neibhah boon wa ong kani toh ka kaam namo ka Issue Election donhi, tangwa ka MDA wa yahkhmat u Conrad toh kawa kreh yei kaam wei chiboon i roi i paar da ye ko u wanrah la wyrchaw wa kiwi ki sorkar nachwa hanla haki 5 snem ka sorkar chah pynthut ko haki rukom waphær waphær leh.
Hawa pynkynmoo u yei por wa pdiang ki khynroo yaki Montri sorkar daki slipar heipor hiar ki cha Mukroh hadien i jia chah siat, ong u wym em sñiawphær u yeini neibhah katu toh ka bynta yong ki kam kiwa yahkhmat paidbah, ka bynta yong ka Politics wei i leh ki khynroo heitu i por toh du nei chah yahluti bakla.
Tangwa hei manbru teiñ teiñ kam kiwa mihkhmat leh kwah hi ki u yoh leh i yaroh naki paidbah hawa lehbha.
