Booh naam ka India Post ya u Kiang Nangbah ha ka Special Cover wa Pictorial Cancellation

Ynne ka sngi man ko ka wow sahkynmoo ya ki khon ka Ri-loom Jaiñtia heiwa ka India Post da pynlait ko ya ka Permanent Pictorial Cancellation yong u Mot Sahnaam U Kiang Nangbah (Kiang Nangbah Monument) wa ka Special Cover U Kiang Nangbah.

Ya kini da pynlait ha ka yalang wa man ha Kiang Nangbah Govt. College, Jowai heiwa u MLA ka Jowai, u Wailadmiki Shylla da man u kam u kongsan hei emlang u CEM ka JHADC, u Thombor Shiwat, u Director of Postal Services (HQ) North East Circle, u KVL Murty, u Dolloi ka Elaka Jowai, u Puramon Kynjing wa kiwi.

Ha kani ka sngi u Principal ka College uwa man leh u President ka Seiñraij Jowai, u H. Toi da khana u ya ka parom u Kiang Nangbah heiwa da ong u wa ynne man sakhiat ko ka sngi wow sahkynmoo yanom.

U KVL Murty da ong u wa i pynlait ya kini ki Pictorial Cancellation man i wow tip ka India wa ka pyrthai chaphang u Kiang Nangbah, wei i yakhun yong u Kiang Nangbah tæ yoh i ya i laitlooid katni.

Related posts

Ym em kiwa ye u ong deiwa tikna wa yoo yei lai i wan ki chi kurim wa wiar

June 1, 2025

Dawa ka JSU wow kyrriah ya u chrot bordiñ wa jooh chah tyrrah man-i-por

June 1, 2025

Da ong u leh wa ka thaaiñ chaneiñ mihsngi man ko kawa embhah heiwa da pynmih ko chiboon ngut ki bru wa chlur wa ki khroo pyrkhat kiwa da chakri ya ka ri.

U Murty da kyntu u leh ya ki paidbah wow chim kabu ya ki chakri ka Post Office ym du wow phah tiar, phah kot phah chithi tangwa wot wow thap wei pynlang poisa leh kamjooh.

U Wailadmiki hawa e i klam da e khublei u ya ka India Post wa da tipmit ko ya u khlawait ka ri deiwa pynlait ya ka Permanent Pictorial Cancellation yong u Kiang Nangbah kamjooh wa ka Special Cover.

Da ong u wa hanla ka yalang man ko kawa khian tangwa man ko kawa emkaam bha heiwa ya ini da leh du chisien donhi heiwa daw pynmih ya ki Envelop wa em i dur wa i parom wa tbian u Kiang Nangbah heiwa kini ki Envelop u lai ki ha kylleiñ ka pyrthai.

Chooh chooh da ong u wa i katni ym sñiawthooh i yei kordor yong i laitlooid neibhah wa da kha laitlooid chwa ya i deiwa kyntu ya waroh wow pteiñ yeiwa yahluti u Kiang Nangbah.

U Wailadmiki da kyntu u leh wow em noh da iwi donhi i dur u Kiang Nangbah khnang wa manda pynmih ya ki mot, ki parom wa kiwi u pynemkaam noh du da iwi donhi i dur deiwa pynrap wa u chna noh ya u mot yong uni u khlawait ha ka College hanlada u pynlut u na ka kata u leh.

Da kyntu u leh ya ka chnat India Post wow wai ka dwar wow e khih e kreh ya ki khynnah khynroo khyllood na ka thaaiñ hapoh ka chnat neibhah wa man kiwa smat u tip wei kiwa yaichah.

Kini ki Pictorial Cancellation wa ka Special Cover toh ka wow chon næ pynmih du chisien donhi.

Ka Anjali Verma kawa man ka Senior Superintendent of Post Office, Meghalaya da batai ko wa ki Special Cover kiwa man ki Envelope wa em i dur u Kiang Nangbah u yoh ya ki kat hadooh wa dang em kiwa dadep chon namo ka Stock katwa ka Pictorial Cancellation won toh ka chaap (Seal) wa em i dur u Mot Sahnaam ha Syntu Ksiar wei u neh bait ki hadooh 5-10 snem hadien leh wei kini man kiwa da tipmit da ka sorkar India.

Da khana ko leh wa ya kini ye u yoh na Shillong GPO hei dor wa ₹20 neibynta ka Special Cover katwa ka Pictorial Cancellation toh dei mynkna.