Ka Rotary Club Jowai ha ka thong wow ya ksohktilang wa ka pyrthai chityllup hei kynmoo warom ya ka World Environment Day kawa haap ha ka 5 tarik Naiynru, ynne ka sngi Musiang 3 tarik da pynman ko ka yalang kyrpang ha Khliehtyrchi Secondary School, Thadlaskein Block wei ha kani ka yalang da sakhilang leh da u Dr. Vincent Darlong, Ex-Vice Chancellor Martin Luther Christian University, Shillong kam u kongsan wa u Vivek Kumar Co-founder and Director, Saindur Enviro Shillong kamjooh u Researcher ka NEHU, Shillong najrong u Waheh Chnong Khliehtyrchi wa ki dkhot ka Rotary Club, Jowai.
Ha ka yalang yahkhmat yong kani ka sngi wa da pynlai da u Rtn. Montri Passah MPHF, President Rotary Club Jowai da kdar luti dei rwai yei sur National Anthem neitae pynbood i klam i batai heiyatoh waka Environment Day na u Rtn. J.M. Pohsngap, Ex-Conservator of Forest, Govt. of Meghalaya wa kamjooh na u Vivek Kumar naka North Eastern Hills University, Shillong.
U Rtn. J.M. Pohsngap hawa klam da pynsñiaw u hapyrdi ki khynnah skur wa kammon wan ka World Environment Day, chooh chooh da khanna u leh wa ka phang yong ka World Environment Day ha u snem 1972 toh ka jooh ka phang kawa da wanrah ha uni u snem 2022 kawa ong “Only One Earth”.
U Vivek Kumar won hawa klam da pynwyrngia u ya ki khynnah skur da ki rukom lehke wow khriñ yei pyrkhat pyrdaiñ yong ki chaphang kammon u sñiaw mantre sakhiat ki heiyatoh wow yada yei man khooid ki soodong sookun ka bei rymaw wei da ban joor u leh ya ki khynnah skur wow booh ki hei thij i pyrkhat yong ki ya kini ki kyntien wa ong “One Earth-One Person-One Action”.
Kiwi kiwa da e kyntien heiyatoh waka World Environment Day toh u Kitbok Rymbai, Waheh Chnong Khliehtyrshi, u Rtn. S.K. Lato, MPHF wa kamjooh leh kyrpang na u Rtn. Dr. Vincent Darlong, Ex-Vice Chancellor Martin Luther Christian University, Shillong.
U Dr. Darlong hawa klam da batai u chaphang kammon ki khynnah skur ha ki thaw ki ri kiwa da pyrkhat jngai yei man ka rymaw pynmlien ki wow leh yei kaamram hei im wa man-ka-sngi neibynta wow man ki soodong sookun ka rymaw kiwa yohlaad u sap u kup yei dur wa khooid wa jngiar wei miat yirngam, hei pynkut yei klam da kyrsu kyntu u leh ya ki khynnah skur ka Khliehtyrchi wow yaleh u pynmyllien hei im wa man-ka-sngi u man ki ki bru kiwa sumaar u yada ya ka rymaw wa ki soodong sookun yong ka.
Neiliang ka Rotary Club Jowai da booh thong wa ha ka World Environment Day Celebration yong uni u snem u thung ko kamwa 200 tylli ki tredieñ dei yakrehlang ki khynnah skur wa ka Dorbar Chnong Khliehtyrchi.
