Ka Society for the Study of Law, Jaiñtia Hills da thoh ko cha u Montri ka Law Department, u James Sangma yow dawa booh National Law School ha Ri-loom Jaiñtia hadien wa ka sorkar da dep chim ko ya ka rai wow wanrah ya ka National Law University Ordinance 2022 kawa daw rah haka yung dorbar chna aiñ yow mynjur khaddooh.
Ka sorkar da dep ko leh wow rai wow pynkrehkaam ya kani ka Law University na i thaw wa chipor hei lut wa T. 6.5 klur chi snem deiwa chim ya 60 ngut kiwa lai puræ ha ka chi snem.
Neiliang ka Society da ong ko wa hajrong ini da kyrpaad ya ka sorkar wow booh ya kani ka National Law School hapoh ka Ri-loom Jaiñtia la ha East namo West Jaiñtia Hills.
Da kdaw wa ka Society for the Study of Law kawa da sdang ha u snem 1986 wei deiwa kyrchaan ka imlang sahlang da ye ki wow sdang ya ka Khadar Daloi Law College ha Jowai ha u 1986 wei hapyrdi boon i eh i khoo da ye ko wow pynmih chiboon kiwa da pyndep yei puræ aiñ.
Tangwa neidaw won wym em ki thaw puræ wa rap heh kyrdan, ym yoh kiwa da pyndep ya ka Graduation ha ka aiñ wow pynpliah chooh chooh yei puræ puthi wei ini da emkaam bha hapoh ka Ri-loom Jaiñtia neibhah cha Ri-loom Khasi wa Garo da em ki yei thaw puræ aiñ yong ka jylla kamjooh ha ka kyrdan yong ka ri.
Da ong leh wa ka Ri-loom Jaiñtia da kular ya ka boon jait heiwa da em i yaklam wow sdang ya ka NEHU Campus ha Moodymmai hadien won da ong wow booh ha Wahiajer wei da em leh iwa da sñiaw wow booh ya ka Engineering College ha Shangpung tangwa waroh kini hawa kut da man ki du kam ki khubor hamsaya katwa ka Ri-loom Khasi khamtam ka Shillong da em ko boon jait ki thaw puræ nadooh wow booh ya ka Medical College ha Shillong wa Tura. Ka Tura da em ko leh ya ka NEHU Campus.
Da kdaw leh wa daw chna leh ya ka Veterinary College wa Dairy College ha Ri-Bhoi wei da em leh ka thmu wow chna ya ka Fishery College ha Ri-loom Garo, kamtæ daw man iwa kmen lada ka Ri-loom Jaiñtia u yoh ko ya ka National Law School ha kani ka kynti.
Da ong leh wa ka Khadar Daloi Law College kawa em ha Jowai toh kawa da tipmit da ka NEHU kamjooh ka Bar Council of India wei kawa da em i yong ka hi ka yung krehkaam wei smat ki wow ya krehlang hadooh wow e kti ya kani ka College cha ka sorkar yow booh ya kani ka National Law School.
