U Montri ka sorkar pyrdi wa pait ya ka chnat Law & Justice, u Kiren Rijiju da ong u wa ka khubor wa sñiawsuk wow chem wei yoo wa ha kini ki 7 tylli ki snem, ka sorkar bei na Delhi da theh sakhiat ko ya kiwa boon ki kaam pynroi ha ki jylla wa em ha ka thaaiñ North East yong ka ri, wei yeini da ong u hawa yaklam wa ki laad pathai khubor ynne ka sngi ha nongbah Shillong.
“Kini ki kaam pynroi wa da wan wow theh da ka sorkar bei, da man i kam ka nongmuna wow pynyoo hadooh katwon u Montri Rangbahdooh ka ri, u Narendra Modi sñiaw maya wei sñiaw jan bha u ya kani ka thaaiñ wei wow pynyoo yeini da wanrah ya kiwa boon ki Scheme pynroi ya kani ka thaaiñ,” da ong u Rijiju.
Hawa kyruiñ cha ka mang tyngka kawa man-u-snem yong ka ri, da klam che wa da man ko ka mang tangka wa da wanrah ya ka thaaiñ North East kawa da yoh bhah wa kyrpang wei da pteiñ ko wow ku na uwi u snem cha uwi won wei ya kani ka mang tangka da jooh bhah cha man ki sorkar jylla ka thaaiñ næ lyngba ka North Eastern Council.
Tangwa u Rijiju da sñiaw u wa iwa sah hi chong ha ki Montri Rangbah yong ki jylla ka thaaiñ wow chimkhia wei neiliang yong ki leh toh u booddien ki ya ki kaam pynroi wa da bhah kyrpang lyngba ka sorkar bei wei toh u pynkrehkaam hok ya ki.
