Ka KSU Narpuh Circle ha ka 23 tarik da lai pait ko ya ka Sub-Station yong ka MeECL wa em ha Lumshnong neidaw wa dooh bordiñ man-ka-sngi ha thaaiñ Narpuh iwa da pynlyngngoh ya ki paidbah neibhah wa ini da jia i mar ya joo u slap wot hapyrdi wa rang leh.
Ha kani ka sngi da yoh ka seiñ wow yaklam wei wow kylli na ki ar ngut ki wakreh wa em ha katai ka yung krehkaam wa neiyi i daw i bordiñ thut i man-i-por heiwa da pyntip da kini ki wakreh wei da pynyoo ki leh ya chiboon i duna wei kamjooh ki tiar kiwa da sih.
Da pynyoo leh ya uwi u tiar wa pyndait ha u Transformer uwa da tip kam u Silica uwa da sih wei da emkaam wow kylliang da uwi. Iwi won i bynta wa pyndait wa u Transformer toh ka Tanker wa thap umphniang kawa da pai, wei kani leh toh kawa emkaam wow kylliang lane chna pynbha.
Sa kawi won toh ka Battery wei i dooh ya uni u Battery da pynman wa lada dooh bordiñ ka 11KV cha Lumshnong itæ mut wa hap pyndooh waroh kitæ nadooh 33KV Sub-Station Kuliang, 11KV Line Tongseng neidaw wa da sih uni u Battery.
Chooh chooh hawa yaklam wa u SDO Distribution Mowakhu, da khana wa em du ar ngut ki Lineman wa pait ha waroh tymbud lada thut i bordiñ wei kamjooh da khana u leh wa i dooh bordiñ toh neidaw wa sih ki tiar iwa man i daw wym jooh neh bait khlem dooh bordiñ.
Hawa kylli won yei thut i bordiñ wa ini ym toh de i sien wa nyngkong lane u snem nyngkong, tangwa da maad yeini da boon ki snem wa da lai heiwa ka seiñ da pynbaad ko ka sorkar da leh arsap ko deiwa phah da ki tiar kiwa da sih da rim.
Neiliang u SDO da ong u wa neiliang ka yung krehkaam yong oo wym kwah ki wow chong ngiah, tangwa ki wakreh da yaleh chitom ki wow pynbiang bordiñ ya ki paidbah. Da khana u leh wa dadep wow thoh cha kiwa haneiñ wei da kdaw leh ya ki tiar wa emkaam wei da dawa wow pynbiang.
Neiliang yong ka seiñ da kyntu ko ya utai u SDO wa kamjooh ya ka sorkar jylla wa i por da biang wei ym ye u chah de yei jooh chi jooh neibhah ki paidbah leh da ngiah ki wow maad yeini i eh hawa yatoh wa i bordiñ.
