Ki bor District ka West Jaiñtia Hills ynne ka sngi da pynlait paidbah ki yaka Final Electoral Roll namo ka thup ki pyrtuid kiwa em hok wow thap Vote kiwa da dep pynbait khaddooh neibynta ki 4 tylli ki Assembly Constituency kitæ ka 1- Nartiang (ST), 2- Jowai (ST), 3- Raliang (ST) wa 4- Mowkaiaw (ST).
Ya ki Electoral Roll da saam cha ki seiñ saiñpyrthai da u Deputy Commissioner, u Garod LSN Dykes, ynne ka sngi ha kamra Conference Room ka yung krehkaam yong oo, deiwa em leh u Additional Deputy Commissioner u L. Kynjing, Extra Assistant Commissioner (Election) ka D.D. Syngai, ka EAC ka YR Mawlong deilang wa ki wakreh ka chnat Election.
Hawa khana ya kiwa mihkhmat ki seiñ saiñpyrthai, u DC da pyntip u wa ha kani ka Final Electoral Roll yong ki 4 tylli ki Constituency da em 71,790 ngut ki chynrang wa 77,469 ngut ki kynthai deiwa kheiñ yaka 01-01-2021 kam ka tarik khaddooh wa kheiñ ya kiwa da dap 18 snem. Da kyrpaad u leh ya kiwa wan mihkhmat wow paitbniah bha ya kiwa em pyrtuid wei lada em iwon iwon i bakla yow pyntip yow ye u pynbait.
Ka D.D Syngai EAC (Election) da pyntip ko hadien wa leh yaka Summary Revision ya ki pyrtuid kiwa thap Vote hapoh ka District ha ki 4 tylli ki Constituency. Kiwa thap Vote haka Draft Roll da em ki 1,43,655 tangwa hadien wa leh yaka Summary Revision namo wow pynthymme, da em 1,49,259 ngut kiwa thap Vote iwa ym em kheiñ yaka 7-Almarem (ST) Constituency kiwa da leh da ki hi ya ini. Da e khublei ko ya kiwa mihkhmat ki seiñ saiñpyrthai, ki BLO, ki Supervisor waki Field Officers yeiwa kreh chitom ki heipor wa leh yei pynthmme namo ka Special Summary Revision.
Kiwa thap Vote man ki kamni- ha 1-Nartiang (ST) da em waroh 40,274 ngut (19,692 ngut ki chynrang wa 20, 582 ngut ki kynthai). Ha 2-Jowai (ST) da em 37,783 ngut (17,738 ngut ki chynrang, 20,045 ngut ki kynthai). Ha 3-Raliang (ST) da em waroh 36,341 ngut (17,297 ngut ki chynrang, 19,044 ngut ki kynthai). Ha 4-Mowkaiaw (ST) da em waroh 34,861 ngut (17,063 ngut ki chynrang, 17,798 ngut ki kynthai).
