Yow pynpsiah hei thij i pyrkhat ki khynnah wow sñiawtre ki yei chnong i thaw yong ki kamjooh u sñiawthooh ki yei emkaam i khooid i jngiar nadooh hapoh yung wa cha lait, ynne ka sngi ka District Informatic Officer NIC, West Jaiñtia Hills, ka Pynbeitbha Passah da chim ko yaka luti hei sien wa nyngkong wow chdooh u yahluti yaki khynnah skur hei pynkhooid yaka wah Myntdu kamjooh ki rood ki kiar yong ka deiwa sdang na Khimusniang najan ka Dam taan um ka PHE wei pynkut won ha Syntu Ksiar.
Heini i pynkhooid wah Myntdu da chimbynta kamwa 10 tylli ki skur deilang wa ki College wa em hapoh chnong Jowai najrong kiwi won ki bru samen wa em i sñiawkhia hajrong kani ka thong.
I rukom pynkhooid toh deiwa lai kjat na rood ka wah Myntdu deiwa jied khnang yei jhep tymbud luti i rood ka Myntdu wei da thap leh yei jhep ha jar jiar ki muna. Manda poi won ki ha Syntu Ksiar da noh ki hapoh ka kari Municipal kawa da yang chwa yow kit yei jhep wa jied ki.
Hei yaklam waka Pynbeitbha Passah ong ko wa kam kani ka jait pynkhooid deiwa lai kjat yarap ko yei chait i khiah ki khynnah kamjooh wow tip ki leh yei chah ktah ka rymaw.
Wei ha samen samen ki khynnah da yoh ki u yoo kiyi ki jait jhep jait tngit wa boon dooh wa kai cha ka wah Myntdu naka chnong Jowai, heiwa ye won ki leh u e buit yeiwa emkaam u leh neibynta i chait i khiah kamjooh u yada yaka rymaw. Heijooh i por wow khana pateiñ ki cha kiwi won yoh u embynta lang ha kani ka sngi.
Heiyatoh wa kani ka thong, ka Pynbeitbha Passah pyntip ko wa neiliang ka DM&HO da e ko ki ORS, ki sap-kti, ki muna pynlang jhep, katwa ka Municipal won pynbiang kari kit jhep ko.
Da pyntip ko leh wa heini i jied jhep iwa boon dooh chem ki khynnah toh ki that, wei dang ong ki sñiaw lakam wa li jied sula Second Hand.
Discussion about this post