Shillong: Ka Election wow jied ya ki MDC ha ki ar tylli ki District Council kawa da man ynnin ka 27 tarik pynyoo i wa kiwa thap vote boon ki ha thaaiñ nongkyndong bar ya ha sor.
Neiliang u Commissioner & Secretary ka District Council Affairs, u T. Dkhar da pyntip u wa katkam ka yukheiñ wa da yoh na ki Deputy Commissioner yong waroh ki district, i poi kiwa thap vote cha ki ar tylli ki Autonomous District Council (ADC) da man i 89.22 % ha JHADC wa 76.67 % ha KHADC. Ini pynyoo i wa i wan kiwa thap vote ha uni u snem duna i hawa wyrchaw wa u snem 2014, heiwa ha JHADC da kynjoh 92 % katwa ha KHADC da poi ko 78 %.
Ka Constituency wa boon dooh kiwa thap vote ha KHADC toh ha Nongshken heiwa da wan hadooh 88.22 %, katwa ka Nongthymmai toh kawa duna dooh heiwa da wan du 48.50 %, katwa ha JHADC ka constituency wa boon dooh toh ha Tuber kawa da kynjoh 96.40 % katwa kawa duna dooh toh ha Jowai-North kawa da poi du 81.10 %.
Da pyntip u leh wa kani ka Election da man ko kawa jop hanlada pynthut ka mariang tangwa mih hi ki paidbah.
U Dkhar da ong u leh wa i duna kiwa thap vote ye wow man nei pynthut ka mariang, tangwa ha kani ka kynti ki paidbah ha ki thaaiñ nongkyndong da rap mih ki.
Chooh chooh da pynrap u wa i daw wa duna kiwa thap ha sor boi ye u man neidaw wa artatien ki paidbah ya ki kyrtong kammon u kreh ki kam ki MDC, neibhah yaphær i na i jied MLA wa MP.
Heiyatoh wa i pynbaad wa joor i saam poisa, da pyntip u wa ka chnat ym em yoh ko kawon kawon ka ujor hajrong kani ka bynta.
Da pyntip u leh wa i niaw vote daw sdang i nadooh 8 waje i step ha ka 2 tarik.
Discussion about this post