Ka seiñ JSU hadooh ynne ka sngi da pteiñ ko ya i yakhih yong ka wow kynreh ya ki kot ki sla ki baar jylla kiwa da wan kreh ha ka jylla.
Ynne ka sngi ki dkhot ka JSU na Khliehriat Circle wa ka Southern Border Zone ryngkat i synraan kiwa kitkaam ka seiñbei da hiar ki cha Ratacherra ha ka thaw psiah wow mih ka jylla.
Ka seiñ hapoh i yahkhmat u Livingson Dkhar Sana uwa man u President ka Khliehriat Circle wa u President ka South Border Zone u Ajoymenson Lyngdoh ryngkat wa ki dkhot ka seiñ da hiar ki wow pait ya ka khyrdop wa man ka thaw psiah chapoh jylla lyngba ka East Jaiñtia Hills heiwa da chem wa kani ka khyrdop ympu man ko kawa biang paka wei ka sorkar da pynman ko ya kani ka thaw kam ka thaw Check COVID-19 yeiwa ka seiñ da beiñ joor ko ya ka sorkar.
Ka seiñ da chem ko leh wa boon na ki baar jylla kiwa wan psiah na kani ka thaw da e daw ki wa lai emkaam ki cha ki karkhana pynmih khyndaw-bilat wei boon na ki ym biang ki ya ki kot ki sla wow psiah chapoh jylla wow lai kreh ha kini ki karkhana.
Neiliang ka seiñ da ong ko wa daw pteiñ ko ya ini i kynreh kot ya ki baar jylla deiwa kyntu leh ya waroh ki tre jylla wow man ki kiwa husiar wa kiwa syndong ha kam kini ki por deiwa kyrpaad leh ya ka JHADC wa ymtoh de wow e kot hi-eh cha ki baar jylla khlem ki daw wa skem.
