U Chairman ka Jowai Municipal Board (JMB), u Philanderwell Lyngdoh hawa klam haka yalang pynlait paidbah yaki Ticket Lucky Draw ka Kur Soo Kpoh Khadar Wyrnai, Jowai ynnin ka sngi, da pynsñiaw haroh u yei lai luti ki Chairman ka JMB ha chwa yong oo.
Da pyntip u leh wa i sahteiñ wow pyndep ya kattu katni ki kaam toh wa ha uni u snem 2024 da em i pynkylla kattu katni ki kyndon neibynta u pynkrehkaam yaki Scheme wa yoh yarap naka Ministry of Housing and Urban Affairs ka sorkar India heiyatoh waka Jowai Municipal Board.
Itæ toh wa kam i pynmiat pynbha wa jooh yoh neibynta ki yung Hall, ha uni u snem wym chah de ki kyndon neibhah wa da kheiñ kini toh ki kaam yong chnong namo ki Community Development, katwa ka Municipal toh kawa rap pyrkhat bha yei khooid i pliah deiwa e yarap 99.9% neibynta kammon u pynmiat pynbha yaki dooid, ki nala wa ki paiñkhana paidbah.
Hawa kyruiñ won u heiyatoh wa i thaw noh jhep, ong u wa dei yahluti u Blai da em ki bru wa em i sñiaw mynsien para bru hanla deiwa hap u su da ka poisa leh da yoh u noh yei jhep hei thaw yong ki.
Da ong u leh wa yei jhep da hap wow noh dei rieh dei tooh, i daw toh lada tip ka chnong ka thaw wa poi i jhep ka Jowai Municipal wym tip de ki wow baam wow dih wa da kynreh i jhep yei sñiaw ki.
Da ong u leh wa kiwa boon bha na kini ki chnong kiwa pyrchah man ki leh kam kiwa chong chnong ha Jowai wei kam ka chnong Jowai ym em beh ym em chrai i ki hadooh wym em khang wow chna yung chna sem ki.
Heiyatoh wa ini i ya takhooh hei lai luti, ong u wa em hi won leh ar bynta, iwa nyngkong neibynta u pynbna yeiwa jooh man, iwa ar won yow lai noh haka luti wa che ha i rukom ka juk wa katni deiw wym toh de u noh jhep kam nachwa tangwa u lai noh katkam wa yah ka juk stat thymme.
Discussion about this post