Ka seiñ Jaiñtia Students’ Movement Eastern Region hadien wa da yoh chiboon ki ujor na ki paidbah yong ka East Jaiñtia Hills District wa boon ki dukan dai marbaam kam ha ka yaw Ladrymbai, Khliehriat, Sokiloo wa kiwi kiwi wa dai ki ya ki marbaam wa da kut por (Expired) wei ini da booh ko hei maa wa khroo ya i chait i khiah ki paidbah khamtam ya kitu ki wym tip wow pait ya ini heipor wa thied ki ya ki mar.
Kamtæ neiliang ka seiñ ha ka 21 tarik uni u bnai da lai yachem ko ya u District Food Safety Officer, Khliehriat u N. Lyngwi deiwa e dei thoh hajrong kani ka phang deiwa wa ong wa toh u pynman ya ka lai sylli namo ka Inspection wei wow pynman leh ya i pynsñiawthooh paidbah heiyatoh wa ini i kaam wei wow pynchitom katkam ka kyndon lada chem ya ki dukan wa leh ya ini.
Neiliang u sahep da ong u wa toh u pyntip cha oo ya kiwa leh kamni yow ye u leh katkam ka aiñ khnang yow pynchitom ya kiwa dai dukan, ki Wholesaler heiwa neiliang ka seiñ da dawa ko na u sahep wow phah u leh dei thoh (Notice) cha waroh ki dukan wei lada ym chimkhia u ya ini, ka seiñ ym yohsa ko wow leh ya iwa emkaam deiwa lai khynra cha ki dukan waroh hapoh ka District.
Ka seiñ da kyrpaad wei pynchlur ko ya ki paidbah yong ka District hi waroh kawi wa toh u paan ki da ka Cash Memo wei wow paitbniah ki chwa wow thied ya kiwon kiwon ki marbaam mardih khnang wow lait na i chah ktah yow lait i maa ya i chait i khiah.
Ki paidbah wa chem yei em wa dai ya ki mar wa da kut por wow pyntip ki cha ka seiñ deiwa Phone ha uni u Mobile Number 8787789140 yow ye u leh ya iwa emkaam.
