Jowai: Ki pyrtuid wa khadooh yong kiwa thap vote namo ka Final Electoral Roll ya ki 4 tylli ki Constituency wa kynthup ya ka 1- Nartiang Assembly Constituency, 2-Jowai Assembly Constituency, 3-Raliang Assembly Constituency wa ka 4-Mowkaiaw Assembly Constituency da saam ya ki ynne ka sngi cha ki seiñ saiñhima ha ka yalang wa pynman ha Conference Hall ka yungkrehkaam u Deputy Commissioner ka West Jaiñtia Hills heiwa da emlang leh u Deputy Commissioner uwa man leh kam u District Election Officer, u R. Rapthap, ki Additional Deputy Commissioner u D.M. Wallang wa u S.C Laloo wa u Extra Additional Commissioner B.J. Kharshandi.
Ha chwa wow saam ya ka Electoral Roll, u R. Rapthap, District Election Officer da pyntip u wa ha ka Final Electoral Roll kini ki 4 tylli ki Constituency waroh da em 1,32,564 ngut kiwa thap vote wei da em leh 5301 ngut ki pyrtuid ki khynroo khyllood kiwa dap 18 snem katkam ka 01-01-2018.
Ha kani ka sngi leh da pynyoo cha ki dkhot ka NPP, UDP, HSPDP, INC wa ka BJP yei rukom krehkaam ki kor VVPAT.
Na ki 1,32,564 kiwa thap vote 63,833 toh ki chynrang wa 68,731 toh ki kynthai. Ha 1-Nartiang Assembly Constituency em ko 36222 kiwa thap vote heiwa 17813 toh ki chynrang katwa 18409 toh ki kynthai, 2- Jowai Assembly Constituency em ko waroh 34072 kiwa thap vote heiwa 15977 toh ki chynrang katwa 18095 toh ki kynthai, 3- Raliang Assembly Constituency em ko 31671 kiwa thap Vote heiwa 15043 toh ki chynrang wa 16628 toh ki kynthai, 4-Mowkaiaw Assembly Constituency waroh kiwa thap vote toh 30599 ngut heiwa 15000 toh ki chynrang wa 15599 toh ki kynthai.
Discussion about this post