Shillong: U Spokesperson ka BJP wa pait ya ka Meghalaya, u Nalin Kohli da ong u wa em boon ngut ki MLA na kani ka jylla kiwa da lai yachem ya ki heh ka party cha Delhi kiwa ye u psiah cha ka seiñ tangwa da kyntait u wow khana bniah chaphang ini.
Ha yaklam wa kiwa pathai khubor ynne ka sngi hadien wa kut ka yalang yong ka Core Committee ha Shillong, u Kohli da ong u wa “ym du chisien tangwa da boonsien wa ki MLA na ka jylla da yachem ki wa nga hei yatoh wa ki kaam saiñ hima sima tangwa ympu kwah o u khana bniah yeini katni”.
Ini i khana u Kohli da pynsakhiat i ya ka khubor hamsaya wa ong wa em ki MLA ka liang synchaar kiwa lai yachem ya ki heh ka BJP, wei hei yatoh won wa ki ar ngut ki montri ka sorkar kiwa da chah pynhiar chuki u Kohli da ong u wa hadooh katni ympu em u yachem ki wa oo tangwa oo bien u wow yachem ya ki la heiwon iwon i por wa kwah ki.
“Toh u man i iwa kmen neibhah ini waroh da pynsaskhiat i wa ki paidbah da ngiah ki u em ha ka jhad ka wow ngam noh chapoh duriaw,” da ong u Kohli.
Da ong u leh wa i jied ya ki kyrtong neibynta ka Election ha u snem wow wan daw leh hadien wa da chong pyrkhat ka seiñ. .
Chooh chooh u Kohli da ong u wa ka Congress hapoh i yahkhmat u Dr. Mukul Sangma hapoh ka jylla kyllooh bha ko katni neibhah ka ymtip de ko ya ka mynried ka yong ka.
Hei yatoh won wa i yalok wa kawon kawon ka seiñ, u Kohli da ong u wa ini ye i u jia heiwon iwon i por chwa namo hadien ka Election.
Da pyntikna u leh wa i synchaar hapoh ka jylla Meghalaya ha ka Election wow wan i synchaar ym man de i yong ka Congress tangwa da kiwi tawon.
Heijooh i por da ong u wa i slem kiwa yahkhmat ka party wow wan cha Meghalaya toh wa dang boon kaam ki hadien wa jop ki kyrtong ka party ha ka kaam wow jied ya u President kamjooh ya u Vice President ka ri wei daw wan yalap ki chwa wow man kani ka Election. Da pyntip u wa neiliang yong oo da kyntu u ya u Montri Rangbah ka Ri u Narendra Modi wow wan yalap neibynta ki kyrtong ka BJP.
Discussion about this post