Neiliang u Education Secretary ka KSU Jaintia Hill District u Justice Paul Lyngdoh, da ong u wa em chiboon kiwa da pyndep puræ Nurse hapoh Meghalaya kiwa chong khlem kreh wei ka sorkar toh u thung kreh ko ya ki yow pynbiang wakreh ha ki Corona Care Centre wa ha ki Community Isolation Centre leh kamjooh wei ini daw pynstiñ ko ya i lyngkor ki Nurse kiwa katni da khia kaam bha ha ki thaw sumaar khamtam ha kini ki por wa dang joor ka khlam COVID-19 hapoh ka jylla.
Ha kini ki sngi wa da dep, neiliang yong ka KSU da lai pait ko yei pynkhreh yong ka sorkar ha man ki Sub-Centre, ki PHC wa ki CHC wei kamjooh ha ki Civil Hospital leh wei da chem chiboon i duna hawa yatoh wa iwa emkaam kiwa yoh COVID-19 nadooh ki Oxygen Cylinder, ki thaw thiah, ki dawai dachin khamtam ki Nurse kamjooh kiwi ki wakreh.
Kamtæ da ong wa ka sorkar da toh u booh ko ki wakreh lane ki Nurse kiwa toh u pait du ya kiwa yoh COVID-19 ym toh wow pynkhleh da ki jooh ki Nurse wow pait ya kiwi kiwa kjut. Kamjooh ki Nurse kiwa kreh ha ki Corona Care toh u chong kset ki samen hadien chi tayaw wa leh ki yei naam namo ka Duty.
Chooh chooh kamwa ka sorkar da pynbna ko wow pynkrehkaam biang ya ki Community Isolation Centre ha man ki thaw, da toh leh wow booh da ki Nurse kiwa da biang ka puræ puthi wei ym toh wow phah pait da ki wakreh ASHA ya kiwa chitom na u COVID-19.
