Ka Montri wa pait ya ki kaam Aiñ kawa man leh ka Chairperson yong ka Reservation Rosterwa Reservation Policy Committee, ka Dr. M. Ampareen Lyngdoh da khana ko wa kamwa man katni kiwa boon ki Party ympu phah ki yei e yumut næ i kwah yong ki hawa yatoh wa i pynkylla thymme biang ya ka State Job Reservation Policy.
Hawa klam wa kiwa thoh khubor ynne, da ong ko wa kamwa man katni, ka Committee dang yang ko yei e yumut na ki seiñ saiñ pyrthai wei hadooh katni ym pu yoh wow bichaar iyi iyi leh neibhah boon na ki seiñ saiñ pyrthai ym pu phah ki yei e yumut ki iyi wa kwah ki wow pynkylla hapoh ka Reservation Policy.
Da ong ko leh wa ym em booh por yow pynpoi yei e yumut tangwa ka sorkar u yang bait ko ya ki seiñ saiñ pyrthai wow phah ki yei e yumut yong ki wei da pynrap ko wa nadooh wa da chong yalang ka Committee da sñiawthooh ko wym em ki bru na ka jylla ki wow ye u puræ bniah yei long i man yong ka Reservation Policy ka jylla.
Heijooh i por ka Ampareen da khut ko leh ya ki seiñ waphær waphær wei kamjooh ya ki bru samen wow phah yei e yumut cha ka sorkar deiwa e dei thoh khnang wow sñiawthooh iyi wa kwah wei yeiwa emkaam.
