Ka Jaiñtia Youth Federation-Saipung Circle, lyngba ka Sub-Divisional School Education Officer, East Jaiñtia Hills da pynkynmoo ko ya ka sorkar wow kyruiñ chooh chooh ko cha ka puræ puthi deiwa kdaw ya ki skur sorkar ha Saipung C&RD Block. Neiliang u President ka JYF Saipung Circle, u Oswald B Nampui da pyntip u wa boon ki Govt. LP School ka sorkar da chah ieh ki da ki boon snem khlem ki yung, ki kamra wa paka wow pynman skur.
Da ong u wa i wym em ki skur sorkar wa miat da ktah joor bha i ya ki khynnah ha i puræ puthi ha kiwa boon ki liang.
Neiliang ka seiñ da kyntu ko ya ka sorkar wow pynbiang ya ki kaam wa khian tam ha kini ki skur kiwa da chah iehbeiñ khamtam ha ki thaaiñ palatsor.
Chooh chooh da kdaw leh wa katkam ka Performance Grading Index (PGI) yong ka Education Ministry ka sorkar India, da klam che wa ka Meghalaya da paaw bha ko kam ka jylla wa duna bha ha ki kaam pynroi heiwa da yoh ko ya i naam ‘Worst Performer in India’.
“Ka sorkar MDA ymye hiwot ko wow pynbiang ya ki thaw puræ ha ki kyrdan khian katkam i emkaam ki khynnah ha ki thaaiñ palatsor,” da ong ka JYF Saipung Circle.
