Heiyatoh wa i duna i ye ka Meghalaya wow pynmih bordiñ, u Montri ka chnat bordiñ u AT Mondal da pyntip u wa ka jylla ye ko wow pynmih kamwa 1.5 Million Unit chi sngi tangwa iwa emkaam won toh 6.7 Million Unit chi sngi hanla kattæ leh da ong u wa ym pynjrong ya i por wa pyndooh bordiñ.
Da khana u leh wa dang pynchna ya kawi ka Unit ka Leshka Hydel Power Project, kawi ka Unit ka Stage-3 deilang wa kawi ka Unit ka Stage-4 ka Umiam Hydel Power Project.
Ini mut i wa ha Leshka ar tylli ki Unit krehkaam ki katwa kawi won toh kawa dang pynchna thymme wei da yooluti u wa ha u Naisaphra daw dep u leh yeini.
Da pyntip u leh wa da dep lai hiar u da oo hi cha ka Stage-4 ka Umiam heiwa dang chna pynthymme ya kawi ka Unit wei da yooluti wow dep u pynchna ha uni hi u bnai wei ha ka Satge-3 leh em kawi ka Unit kawa dang pynchna.
Hanla em waroh ini i duna, da pyntip u wa ka sorkar ym pynboon ko yei por wa pyndooh bordiñ wei lada em i pyndooh bordiñ palat yeiwa da booh ye u man neidaw wa sih heini heitai wei wa dang pynchna.
Da yooluti u leh wa ha uni u bnai boi daw joor u slap yow ye u pynduna yei dooh bordiñ wei da pynche u leh wa ka High Court da phah ko wow thied bordiñ yow ye u pyndap yeiwa emkaam ki paidbah tangwa ym em thied hei dor wa sy’at neibhah yei dor ymtoh wa booh da ka MeECL tangwa da ka State Electricity Regulatory Commission ka India wei da thoh cha ki lada bien ki wow pynduna dor.
Heiyatoh won waka Ganol Hydel Power Project, kawa dang dep wai, da pyntip u wa kani ym pu em ye ko wow pynmih bordiñ man-ka-sngi wei daw lai hiar u cha kani ka thaw heipor wa hiar slap yow pait kammon krehkaam ko.
Puræ leh: Da wai ya ka 22.5 MW Ganol Hydro Power Project kawa T. 560 Klur
