U Montri Rangbah ka jylla, u Conrad K Sangma hawa e yei klam ha ka yalang Job Fair for Overseas Placement ha Tura ynne ka sngi yow pynche cha ki khynroo khyllood kiwa kwah wow lai kreh cha baar ri nadooh ha ki kaam Nurse, i chet i tu, i kreh Hotel, i tem i put wa kiwi de ha ki ri kam ka Japan, UK, Singapore wa Suadi Arabia, da ong u wa kini ki ri emkaam bru wakreh bha ki neidaw wa kiwa chong chnong toh kiwa da heh rta wei ki khynroo won duna ki.
Ini mut i wa ha kini ki ri neidaw wym em boon i kha khon ka juk wa katni, kat dang lai i por kiwa kreh kam ki Nurse da chong-ngiah ki wei ym em bru de da kiwi wow kreh deiwa e nongmuna u wa ha kawi ka Hospital ha Japan da em 700 ngut kiwa da chong-ngiah.
Kamtæ da ong u wa hawa pait cha ka ri India, kiwa chong chnong kiwa boon toh kiwa dang khynroo wei ha Meghalaya hawa kheiñ yei rta dang khynroo chooh chooh kiwa chong chnong.
Hajrong ini da ong u wa ka sorkar u yarap ko ya kini kiwa kwah u lai kreh cha baar ri yow lait ki u chah thok ha ki bru wa chim kabu deiwa chdooh wei wow yahluti ki neibhah kiwa boon wym tip ki kammon u leh wei lada pyrchang ki leh em kiwa chah thok tangwa deiwa pyntikna chwa da ka sorkar daw lait na ini.
Da ong u leh wa ka sorkar e yarap ko Rs. 50,000 yow lai pyndep yei chah sikai yow tip u klam yei ktien kini ki ri kamjooh wow pynbiang VISA yow lai deilang wa i kreh.
Da khana u leh wa manda kreh cha kini ki ri, daw ye u yoh tulop hadooh 1.2 lak chi bnai wei manda phah ya kani ka poisa chapoh ka jylla daw yarap ko wow pynku ya ka khayi pateiñ wa i yoh i kot neibhah lada phah poisa ki 10 ngut ini mut i da tam Rs. 10 lak chi bnai wei kat dang boon kiwa lai kat dang yoh myntoi ka jylla.
Da pyntip u leh wa ha kini ki bnai wow wan, daw em sa 27 ngut ki khynroo khyllood napoh ka jylla kiwa daw lai kreh ha Japan, 44 ngut ha Singapore wa 50 ngut ha UK ki wow kreh kam ki Nurse.
Discussion about this post