Ka International Day Against Drug Abuse and Illicit Trafficking da lehwarom ya ka ynne ka sngi ha Jaiñtia Eastern College, East Jaiñtia Hills District ya kawa da pynman da ka District Legal Services Authority (DLSA), East Jaiñtia Hills District, Khliehriat hajrong ka phang “Share facts on drugs, save lives”.
Ha kani ka sngi da yoh yei klam na u Secretary ka DLSA ka District, u D.S. Marbaniang uwa da khana yei emkaam wow lehwarom ya kani ka sngi neibhah i pynemkaam bakla ya ki drugs toh ym du ha ki thaw sor tangwa wot cha palat-sor leh kamjooh.
Da pynsñiaw u leh yei mynsien wa khia hajrong i boon ki khynnah skur kiwa pynemkaam drugs hapoh ka jylla deiwa kyntu ya waroh wow wan chaphrang wow yakhun pyrchah ya ini. Chooh chooh da ban joor u leh ya i emkaam ya ki thaw sumaar namo ki Rehabilitation Center wa pynlai da ka sorkar wa ki seiñ kreh monsñiawbha ha ka District wow yakhun pyrchah ya ini waroh.
Neiliang u Deputy Superintendent of Police (Crime) ka District, u P. Suchiang, da batai u hajrong i man i long katni heiyatoh wa i kyrni wow dih kiad wa i drugs ha Meghalaya deiwa ban joor wa kini ki ar jait man ki kiwa da ktah bha ya ka imlang sahlang wa ka yung ka sem leh kamjooh.
Chooh chooh da ong u wa ki bru kiwa pynemkaam drugs hadien wa chah kem ki da chem wa ym du i kyrni ki hei drugs tangwa da chah ktah ki leh ya u HIV/AIDS. Da kyntu u leh ya ki padiabh wow pynche hajrong i emkaam wow pynsñiawthooh ya kiwi heiyatoh wa i maa wa mih na i pynemkaam ya i drugs wa i kiad.
Ha kani ka sngi da yoh leh i klam na ki bru chemphang kam u S. Pdang, Legal Officer, East Jaiñtia Hills District uwa da klam hajrong ka NDPS Act 1985, u Dr. P. Nongtdu, Principal, Jaiñtia Eastern College wa Dr. J. Nongtdu, I/C OST Khliehriat wa da klam hajrong i pynemkaam durgs katwa u Rihok Bamon wa ka R. Patlong, Mihmyntdu Community Social Welfare Association, da e ki ya ki kyntien khublei.
