Jowai : Hadien wa dep pynman ya ka Awareness Campaign hei yatoh wa ka NPR wa ya u Aadhaar ha kiwa boon ki dong ka Jowai yow pynsñiawthooh yei emkaam u em pyrtuid ha ka NPR wei wow yoh ya u Aadhaar Number; ki bor district da lai ki cha khmat yow leh yei thap pyrtuid ha ka NPR yow ye won u e ya jar jiar ki Aadhaar Number kamjooh leh ya ka Aadhaar Card cha ki paidbah.
Yei thap pyrtuid ha ka NPR da sdang nyngkong ha Loompariat wei da pteiñ ya ka nadooh ka 22 tarik ha Dulong wei u pynkut ha Dulong ha kani ka 27 tarik. Daw pteiñ biang sa ha Carolyne Colony.
Hei yaklam wa ki wa wan leh ya ini i thap pyrtuid NPR ong ki wa kamwa 35% ki bru da wan ki ha Loompariat wei la 45% da wan mih ki bru ha Dulong.
I thmu wei rukom pynkrehkaam ya ka NPR kam cha ka jylla Meghalaya phær ko na kiwi ki jylla kam ka Karnataka, Kerela, wa kiwi kiwi neidaw wa tip ya ki kam ki UIDAI States neibhah ha kam kini ki jylla suk u pyntikna yaki tre chnong wei duna bha kiwa wan psiah be-aiñ cha kini ki jylla.
Ya ka First Phase yong ka NPR da leh nadooh u snem 2010 heipor wa leh ya ka Census wei wa yaki pyrtuid hi kiwa boon da dep thap hapoh ka NPR tangwa ya kiwa ym em mih pyrtuid ha ka Census ye biang u pyndap ya ka NPR Enrollment Form yow em pyrtuid ki hapoh ka NPR.
Kiwa thap pyrtuid ha ka NPR u pdiang du yaki tre ri India wa kiwa tip kam ki Usual Resident iwa mut ki bru wa biang ki kot ki sla hanlada man ki kiwa na bar ri wa wan kreh wan puræ hapoh ka ri India wei daw sah ki ha ijooh i thaw palat 6 bnai.
Hadien ini ye ki u leh sa ya ka Biometric Enrollment wa tip leh kamka Phase 2 yong ka NPR heiwa daw chim leh yaki Finger Print (i chon kti yong waroh ki 10 tylli paraim kti), i Pupil Scan (I chim yei dur ki pyllung khmat).
Heini i por ye kiwa boon ki bru wa ym biang ki kot ki sla nadooh kiwa na Bangladesh kamjooh leh ya ki Nepali u psiah ha kani ka NPR tangwa ya ki pyrtuid yong waroh ki wa em ha kani ka NPR daw phah cha ka waroh ki block ki chnong yow pynsakhiat (Social Vetting) heiwa ki bor chnong kamjooh ki bor district u yoh laad biang ki u pynsakhiat wa toh næ ymtoh ki tre ri wei ya kiwa da kyntait daw pyndooh noh yei pyrtuid yong ki naka NPR wei heijooh ipor ym yohlaad ki u yoh ya u Aaadhar Number.
Sa iwi wa jooh kulmar bha ki paidbah toh wa ong wa waroh ye u paan ya uni u Aadhaar Number kam ka nongmuna heini kiwa wan kreh chapoh ka ri India næ kiwa wan puræ kiwa biang ki kot ki sla ye ki u yoh ya u Aadhaar tangwa neidaw wa man ki bar ri ym ye ki u yoh myntoi ha kiwa boon ki liang kam ka Ration Card, ki Gas Subsidy, ki Scholarship wa kiwi kiwi.
Ka Aadhaar Number man ko leh kamka ID ya waroh wa em hapoh ri (ki bar ri wa ki tre ri) yow chem tre ya kiwa biang ki kot ki sla. Heijoooh i por ki baar ri kiwa yoh Aadhaar ym man ki ki tre ri wei wa ym yoh ki yei myntoi naka sorkar kamwa yoh ki tre ri.
Discussion about this post