U President ka Khasi Student’s Union, u Lambokstarwell Marngar da kylli u wa lada ka sorkar India tipmit næ ym tipmit ko ya ka jaitbru Khasi kam ki tre ri tre jylla, deiwa pynrap wa ha ki kajiak sngi chwa, ha ka 15 tarik uni u bnai da yoo ya i hær lama le rong ka ri ha man ki tnoom yung ki bru.
Da ong u wa ymtoh wa pyrchah ya ka sorkar India, tangwa da kylli lada ka sorkar India tipmit ko ya ki kam ki tre ri tre jylla, wei lada pdiang yeiwa dawa ki.
Ka North East Student’s Organisation (NESO) da pynkhai im biang ko yei dawa wow pyndam ya ka Citizenship Amendment Act, 2019 (CAA) ha waroh ki jylla ka thaaiñ mihsngi deiwa pynman yakhih ynne ka sngi. Ha ka yalang chong kyllaiñmyngnor ha Shillong heiwa ka Khasi Student’s Union kawa man leh ka dkhot hapoh ka NESO da chimbynta ko deilang wa kiwi ki seiñ kam ka FKJGP, HNYF, JSU wa kiwi kiwi. Ha kani ka yakhih da dawa leh wow pynkrehkaam noh ya ka Inner Line Permit, wow pyndam noh ya ka CAA wei wow tipmit ya ka ktien Khasi ha ka Eight Schedule ka riti synchaar ka ri India.
Uni u heh ka KSU da ong u wa i rukom pyrkhat wow thombor ya i hok i dang pteiñ i hadooh katni da ka sorkar India, wei da ong u wa i dawa yong ki ym suki i wei daw pteiñ bait i.
Da ong u wa ki paidbah da burom ki ya ka lama le rong ka ri India, deiwa ong wa lada ka sorkar India burom ko ya ki tre ri tre jylla, da toh u e noh yeiwa da dawa. Da ong chooh chooh u wa ki ar tylli ki Resolution wa ka sorkar jylla da mynjur ko wei da phah cha ka sorkar india, kitæ toh ka Inner Line Permit wei wow tipmit noh ya i ktien Khasi ha ka riti synchaar ka ri tangwa la katwon snem ka sorkar India iyi leh ko hajrong ini.
Da ong u wa i rukom pyrkhat ka sorkar India pynyoo wa kwah ko wow thombor da kiwi ki rukom ya ka pateiñ ka jaitbru.
Heiyatoh wa i thmu wow tih Uranium, wei wow wanrah ya ka luti rel, u Lambok da ong u wa ym emkaam luti rel, emkaam pathan ya ki aiñ yada, ym emkaam wow pynmahajon ya ka sorkar India, tangwa emkaam ya i mynsien yong ka ri wa ka jaitbru, wei ya kiwon kiwon kiwa ktah kiwa pyrchang wow yah bakla, ki dkhot wa chitrhem ka jaitbru daw jubab ki dei kaam.
