Ka President ka East Jaiñtia Hills District Mahila Congress Committee (EJHDMCC), ka Jhanika Siangshai ynnin ka sngi da thoh ko cha u DMHO ka District hajrong i wym krehkaam ka ka thaw sumaar ka Kuliang Health Center.
Ka Siangshai da ong ko wa nadooh u 2015 hadooh kini ki sngi kani ka thaw sumaar ym em u krehkaam ko wei da man ko kawa khang bait heithaw wow ye ko u e chakri ya ki paidbah.
Da ong ko leh wa boonsien kiwa chong chnong da kylli ki leh ya i daw wa ki bor sorkar ymye ki wow wai ya ka khamtam heipor wa wan ka khlam COVID-19.
Kamtæ da kyntu ko ya ka yung krehkaam u DM&HO wow wai biang ya kani ka thaw sumaar neibynta i myntoi ki paidbah.
Kam wow kdaw heini ya kani ka thaw sumaar sdang chna ha u 2013 wei i kreh ya ka da ye u pyndep ha u snem 2015.
Neiliang ka Siangshai da kylli ko wa la ynru snem wa dadep chna ya kani ka thaw sumaar, iyi leh ka sorkar wa ka chnat wow wai ya ka wei sa katwon snem u chimpor wow wai ya ka khnang wow ye u wanrah ya i myntoi cha ki paidbah ka thaaiñ?
Da ong ko wa i chna ya kani ka Sub Center toh wow pynsuk ya ki kynthai kiwa pun-khon wa kiwa kha-khon kamjooh leh wow suk i e tika (Immunization) ya ki khynnah wa kiwi kiwi wei daw pynsuk ko ya ki paidbah ka thaaiñ kam ka Borsara, Lejri wa kiwi kiwi heiwa katni da hap lai ki chadooh PHC Umkiang kawa man kawa jngai.
Da ong ko leh wa em ki paidbah na ki chnong kahppood dei wym yohsa lai thooh dawai ki wot cha Bangladesh wei ini booh i hei eh wa i maa ya ki paidbah du neidaw wym em ki thaw sumaar wa paka yong ka sorkar.
Da kyrmen skem ko leh wa ka sorkar lyngba ka chnat i chait i khiah daw chimkhia ki yeini wow wai noh ya kani ka thaw.
