Jowai : U khynroo Hame Shaniah Suiam na ka chnong Shangpung uwa em kamwa 20 snem i rta daw lai yakhun u ya ka WAKO World Kickboxing Championship kawa daw pynman da ka World Association of Kickboxing Organisations ha Dublin, Ireland nadooh ka 21 tarik hadooh ka 29 tarik uni u bnai.
Uni u khynroo da sdang u wow sikai ya kani ka yalehke nadooh wa em u 10 snem wa neitæ da sikai u khlem chong ngiah hadooh wa da lai yakhun u cha kyllieñ ki chnong ki jylla wat hadooh cha bar ri leh kamjooh.
Nyngkong da lai yakhun ha ka yakop kawa da man ha u snem 2007 ha Chnong Jongsha heiwa da jop u ya ka takma ksiar ha ka kyrdan wa 14 snem chapoh, ha u snem wabood won da yoh u ya ka takma tama ha ka yakhun wa pynman ha Lucknow, wa kiwi kiwi. Tangwa neidaw wa duna poisa wei wym em wa yarap ya oo da dooh u wow lai yakhun ha ki yakhun wa da pynman cha bar ka jylla.
Ha u snem 2014 da yoh takma ksiar u ha ka yakhun 51kg kawa da pynman ha Barbil, Odisha kawa da pynman da ka WAKO India, hadien wa jop u ha kani ka yakhun u Hame da chah jied u wow lai yakhun cha Rimini, Italy ha u snem 2014.
Ha u Naisaphra uni u snem da lai yakhun u ha ka WAKO INDIA Cadets & Senior National Kickboxing Championship 2015 heiwa da yoh u ya ka takma ksiar ha ka kyrdan Senior Men Category ha ka kyrdan 57 kg heiwa da chah jied u leh wow lai yakhun cha ka sorbah Dublin, Ireland ka wow man ha uni u snem.
Wat hadooh kani ka kynti leh neidaw wym em poisa kiwa ha yung ha sem yong oo da haap chim ram ki hadooh T. 70,000 du neibynta ka bai psiah (registration) cha kani ka yakhun. Da haap haroh ki u lai li paan yarap poisa na kiwi ki bru samen yow yohlad uni u khynroo u lai yakhun cha Dublin, Ireland. Weiwa khnang wow yoh u lai yakhun cha kani ka yakhunbah i lut i sep da kynjoh i hadooh T. 3,39,260 tangwa hadooh ynne ka sngi da yoh yarap ki dang du T. 2,00,500 na ki bru samen wa ki seiñ.
Iwi iwa sñiawsarong toh wa uni u khynroo dei mynsien dap chynrang da yakhun bait u wat la dym em thaw sikhai leh da sikai bait u man ka sngi harood Loomtlepbru ka Balang Presbyterian Shangpung.
Hei yaklam wow khynroo Hame da ong u “Lada ka jylla Manipur ye ko u pynmih chiboon ki nongyalehke sport kam ka Mary Kom tæ ka jylla yong i leh u ye bait ko u pynmih ya ki khloor khamtam ha ka kickboxing neibhah chisien lai da wanrah bait i khrui khrui ki medal”.
Ynne ka sngi Ka KSU Jaiñtia Hills Unit da e yarap poisa ko ya uni u khynroo da ka song poisa wa T. 1,00,000 kam ka dak wow wai lad ya oo yow lai yakhun u cha ka sorbah Dublin, Ireland.
Katni uni u khynroo dang puræ u ya ka BSc Electronics 2nd Year ha St. Edmunds College, Shillong. Weiwa thmu u wa lada ym yoh u wow lai yakhun man lei por tangwa u sikai bait u man ka sngi khnang wa mynried yow sikai won u ya kiwi tawan ki khynnah.
Heijooh i por u khynroo Hame da pyntip u leh wa ha kani ka 20 Tarik daw mih u wow lai u cha ka sorbah Dublin weiwa na ka liang u Wyrta kitbok ko ya oo wow ye u u wanrah yei naam wei burom neibynta ka ri wa ka jaidbru.
Discussion about this post