Shillong: Ka Futsal Association of Meghalaya (FAM) lyngba u President yong ka u Dr. Brightstar Langbang da pyntip u wa ka FAM daw phah ko ya ka dhab na ka jylla wow lai yachim bynta cha ka Senior Futsal National Championship kawa daw pynman da ka Futsal Association of Goa kawa daw pait wei pynbait pynryntih da ka Futsal Association of India nadooh ka 7 hadooh 12 tarik u Kmaichonglad (December) 2017 ha Peddem Indoor Stadium, Goa.
Hei yatoh wa ini ka FAM u phah ko du ya ka dhab ki chynrang hanlada em ka bynta neibynta ki kynthai leh deiwa ong wa ka dhab ki kynthai daw phah ha ki snem wow wan.
Kiwa yalehke ki wow chim bynta ha kani ka lympung da jied na kitu ki dhab wa dadep yalehke haka 1st Open Futsal Tournament wa dadep pynman da ka FAM ha Indoor Stadium JN Complex Polo, Shillong ha u Naikhynde uni u snem.
U Langbang da ong u wa ka FAM thrang ko u jied ya kiwa yalehke na kylleiñ ki District yong ka Jylla, yeini ye u pynman sakhiat manda em ki Futsal Association ha kylleiñ ki District deiwa kyrmen wa daw em ki wow wan chakhmat neibynta u chna ya ki Futsal Association ha ki District waphær waphæ yow pynku ya kani ka jait yalehke hapoh ka jylla.
Ka FAM leh kamjooh daw phah ko ya kiwa kitkaam ki yong ka wow chong ki ha ka Seminar neibynta ki Coach wa ki Referee heiwa kiwa sikai u wan ki naka World Futsal Association.
Heijooh i por da ong u leh wa i thmu hi wow phah ka dhab cha kani ka lympung National Level toh wow elaad ya ki khynnah wow maad ki wei wow sñiawthooh bha ki ya kani ka jait yalehke Futsal.
Da yooluti u leh wa manda uiñ ki na Goa, ka FAM daw ye ko pynku chooh chooh ya ka yalehke Futsal neibhah u myntoi ki khynnah wa ki khynroo ka jylla hi waroh kawi.
Discussion about this post