Ar ngut ki khynnah ka Jowai Grassroot Football Coaching kitæ u Eric Tyngkan uwa man u khon ka Sumarbha Tyngkan na chnong Phramer wa u Generous Ksoo uwa man u khon u Yooki Suchiang na ka chnong Thadmuthlong, West Jaiñtia Hills District da chah jied ki lyngba ka Football Trial wa da pynman da ka Assam Warrior Football Academy ha Deinshynrum Artificial Turf Ground, East Jaiñtia Hills District ha u bnai December 2025.
U Eric wa u Generous da chah jied ki ha ka Under-13 Category wei da wan ki ha ka kyrdan wa nyngkong na kiwa boon, kamtæ da yoh ki ka laad wow lai chah sikai ha kani ka Club dei mynkna deilang kamjooh i lai skur chirup i thaw sah (Hostel) wei baam.
Hawa klam wa ki bei ki pa kini ki khynnah, da dap ki dei sñiawkmen wow yoo ya ki khon yong ki wa cha jied ki wow lai cha baar yow yalehbol wei kyrmen ki wow yoo ya ki khon yong ki wow bna naam ki hei yalehbol kamwa ka sap wa da e u Blai wei wow wanrah burom ya ka chnong ka thaw, ka District wa ka jylla waroh kawi.
Neiliang ki tre wa pynlai ya ka Jowai Grassroot Football Coaching kawa em ha Moosalyngkat, kitæ u Aibormiky Suchiang, u Rangkitbok Lytan, ki Coach u Monmi wa u Germy dap ki dei sñiawkmen sakhiat wa toh dang du 7-8 bnai donhi da yoh ki u pynmih ya kiwa yalehke (Players) na ka Coaching Centre yong ki wei kani waroh toh deiwa kyrkhu u Blai wei da e khublei leh ya ki bei ki pa ki khynnah wa da chaniah ki ya kani ka thaw e sikai yalehbol.
Da e khublei leh ya kini ki khynnah wa da chah jied ki lyngba i kreh chitom yong ki, deiwa chimkhia wei man ryntih hadooh wa da yoh ki ya kani ka kabu wow lai pynpliah chooh chooh cha baar ka jylla. Da e leh ka khubor ya kiwi ki para wa yalehke yow man ki kiwa dohyap wow yaichah wei wow pynlut yei bor i sor ha madan lada kwah ki u poi chooh chooh chakhmat yow poi cha ka thong neibhah dei kreh chitom ym ye i wow khanglaad ya kiwon kiwon.
Discussion about this post