Ynne ka sngi, ka seiñ khynroo ka BJP ya kawa da tip kam ka Bharatiya Janata Yuwa Morcha (BJYM) da thoh ko cha u Chariman ka National Commission for Schedule Tribe, New Delhi heiyatoh wa i yap ka Rosy Sangma wa u Samuel Sangma ha sorbah Gurugram.
U Krison Langstang uwa man u President ka BJYM, Meghalaya da ong u ha ka dorkhat wa ka Rosy Sangma da yap ko ha ka 24 Naiynru ha ICU ka Alpha Hospital, Basal, Gurugram hadien wa da pynbaam ya ka da i Ice-cream hanla ymye ko u baam katwa em leh heipor wa chah sumaar ko ha ICU heiwa u Samuel da riñ video u heiwa da pynbaad u wa kani ka Hospital da tynyap ko ya ka Rosy wei da chah jrongkti u leh ha uwi na ki Doctor kani ka thaw sumaar.
Da ong leh wa u Samuel won da pynkut yabor u yei mynsien ha ka 25 tarik ha kamra Hotel wa sah u wei ini i rukom yap u da pynartatien i ya kiwa boon heiyatoh wa i rukom yap u.
Ka seiñ da ong ko wa ini i yap kini ki ar ngut da wanrah i yei tieñ hapyrdi kiwa boon naka thaaiñ mihsngi ka ri wei kiwa boon kiwa da liwan yung neidaw ka khlam COVID-19 da artatien ki wow lai biang cha kiwi ki thaw ka ri.
Kamtæ hajrong ini, neiliang ka seiñ da dawa ko wow chimkhia yeini wei wow pynchitom ya kiwa emkti hei yap syndet kini ki ar ngut.
